రైతులకు 24 గంటల కరెంటు ఇవ్వాలి. • నడిపెల్లి విజిత్‌ కుమార్‌
సూర్య, లక్షెట్టిపేట/ మంచిర్యాల జిల్లా ప్రతినిధి : రైతులకు 24 గంటల నిరంతర విద్యుత్‌ సరఫరా చేయాలని డిమాండ్‌ చేస్తూ బీఆర్‌ఎస్‌ రాష్ట్ర నాయకుడు నడిపెల్లి విజిత్‌ కుమార్‌ ఆధ్వర్యంలో రైతులతో కలిసి లక్షెట్టిపేట పట్టణంలో కొవ్వొత్తుల ర్యాలీ నిర్వహించారు. ఈ సందర్భంగా ఆయన మాట్లాడుతూ కాంగ్రెస్ ప్రభుత్వ హయాంలో విద్యుత్‌ కోతలతో రైతులు ఇబ్బందులు పడుతున్నారని, పంటలు ఎండిపోయి నష్టాలు ఎదుర్కొంటున్నారని ఆరోపించారు. బీఆర్‌ఎస్‌ ప్రభుత్వ హయాంలో వ్యవసాయానికి 24 గంటల విద్యుత్‌ అందించామని పేర్కొన్నారు. విద్యుత్‌ కోతలకు కారణాలపై ప్రభుత్వం శ్వేతపత్రం విడుదల చేయాలని, దెబ్బతిన్న మోటార్లు, ట్రాన్స్‌ఫార్మర్లకు వెంటనే మరమ్మతులు చేపట్టి రైతులకు న్యాయం చేయాలని డిమాండ్‌ చేశారు. మంచిర్యాల నియోజకవర్గంలో రైతులు పంటలు వేయవద్దని ఎమ్మెల్యే ప్రేమ్‌సాగర్‌రావు కోరడం సరికాదని విమర్శించారు. రైతులకు విద్యుత్‌, సాగునీరు అందించకపోతే ఎమ్మెల్యేలు, మంత్రులు, ముఖ్యమంత్రి నివాసాలను ముట్టడిస్తామని హెచ్చరించారు. ఈ కార్యక్రమంలో లక్షెట్టిపేట, దండేపల్లి మండలాలకు చెందిన ప్రజాప్రతినిధులు, మాజీ ప్రజాప్రతినిధులు, బీఆర్‌ఎస్‌ నాయకులు, కార్యకర్తలు, రైతులు పాల్గొన్నారు.
