చేనేత వస్త్రాల కొనుగోలుతో నేతన్నలకు ప్రోత్సాహం

హైదరాబాద్, మేజర్ న్యూస్‌: చేనేత రంగాన్ని ప్రోత్సహించి నేతన్నలకు ఉపాధి కల్పించాల్సిన బాధ్యత ప్రతి ఒక్కరిపై ఉందని పారిశ్రామికవేత్త శ్రీలక్ష్మి అన్నారు. హైదరాబాద్‌లో నిర్వహిస్తున్న రాష్ట్ర చేనేత వస్త్ర ప్రదర్శన ‘షీ-2026’ రెండో రోజు గురువారం ఆమె తన స్నేహితులతో కలిసి సందర్శించారు. పటోళ, చందేరి, కంచిపట్టు, సిల్క్‌ చీరలను కొనుగోలు చేసినట్లు తెలిపారు. మగ్గాలపై నేతన్నలు చేతితో నేసిన నాణ్యమైన చేనేత వస్త్రాలు ఒకే వేదికపై అందుబాటులో ఉండటం సంతోషంగా ఉందన్నారు. మన సంప్రదాయాలను కాపాడుకుంటూ చేనేత రంగాన్ని మరింత అభివృద్ధి చేయాలని పేర్కొన్నారు. చేనేత వస్త్రాలను కొనుగోలు చేయడం ద్వారా నేతన్నలకు ఉపాధి కల్పించడంతోపాటు వారి కళకు తగిన గుర్తింపు లభిస్తుందన్నారు. చేనేత ఉత్పత్తులకు ఆదరణ పెంచి, ఈ రంగంపై ఆధారపడిన కుటుంబాలకు అండగా నిలవాల్సిన బాధ్యత మనందరిపైనా ఉందని శ్రీలక్ష్మి అభిప్రాయపడ్డారు.