అవినీతిని నిర్మూలించాలి : ఏపీజీ బి. మేనేజర్ శ్రీకాంత్
మెళియాపుట్టి, సూర్య : ప్రభుత్వ కార్యాలయాల్లో అవినీతిని నిర్మూలించేందుకు ప్రజల్లో చైతన్యం తీసుకురావాల్సిన అవసరం ఉందని చాపర గ్రామీణ బ్యాంకు మేనేజర్ శ్రీకాంత్ అన్నారు. విజిలెన్స్‌ అవేర్‌నెస్‌ వీక్‌లో భాగంగా బుధవారం చాపర గ్రామీణ బ్యాంకులో వినియోగదారులకు అవినీతి నిర్మూలనపై అవగాహన సమావేశం నిర్వహించారు. ఈ సందర్భంగా ఆయన మాట్లాడుతూ.. ప్రభుత్వ కార్యాలయాల్లో పనులు చేయించుకునే సమయంలో లంచం ఇవ్వడం, తీసుకోవడం రెండూ చట్టరీత్యా నేరాలేనని స్పష్టం చేశారు.
అవినీతి వల్ల ప్రభుత్వ సేవలు, సంక్షేమ పథకాల ప్రయోజనాలు ప్రజలకు సకాలంలో అందకుండా పోయే అవకాశం ఉందన్నారు. లంచం డిమాండ్‌ చేసినా, ఎవరైనా అవినీతికి పాల్పడినా సంబంధిత అధికారులకు సమాచారం అందించాలని సూచించారు. ప్రజలు తమ హక్కులు, ప్రభుత్వ సేవలపై అవగాహన పెంచుకోవడంతో పాటు అవినీతికి తావులేకుండా వ్యవహరించాలని కోరారు.
విజిలెన్స్‌ అవేర్‌నెస్‌ వీక్‌లో భాగంగా వారం రోజుల పాటు గ్రామాల్లో వివిధ అవగాహన కార్యక్రమాలు నిర్వహించి ప్రజలకు అవినీతి వల్ల కలిగే నష్టాలు, దాని నిర్మూలనకు తీసుకోవాల్సిన చర్యలపై వివరించనున్నట్లు మేనేజర్ తెలిపారు. బ్యాంకు సేవలు పొందే వినియోగదారులు కూడా ఎలాంటి అక్రమ చెల్లింపులకు పాల్పడకుండా అప్రమత్తంగా ఉండాలని సూచించారు.
కార్యక్రమంలో బ్యాంకు క్యాషియర్‌ ఈశ్వర్‌, అకౌంటెంట్‌ మీనాక్షి, అసిస్టెంట్‌ షణ్ముఖ్‌, వినియోగదారులు, లబ్ధిదారులు పాల్గొన్నారు.
రిపోర్టర్ : నాగిరెడ్డి, మెలియాపుట్ట, శ్రీకాకుళం జిల్లా.
