ఐదేళ్లుగా పేరుకుపోయిన సహకార చక్కెర కర్మాగారాల కార్మికుల బకాయిలు విడుదల... కార్మికుల్లో ఆనందోత్సాహం

ఏటికొప్పాక షుగర్ ఫ్యాక్టరీ కార్మికుల బకాయిలకు జీవో విడుదల!
కూటమి ప్రభుత్వానికి కృతజ్ఞతలు తెలిపిన శ్రామిక సంఘం

ఎస్.రాయవరం, సెప్టెంబర్ 28, మేజర్ న్యూస్:
ఐదు సంవత్సరాలుగా పేరుకుపోయిన సహకార చక్కెర కర్మాగారాల కార్మికుల బకాయిలు విడుదల చేస్తూ కూటమి ప్రభుత్వం జీవో జారీ చేయడంతో సోమవారం సాయంత్రం చక్కెర కర్మాగార కార్మికుల్లో హర్షం వ్యక్తమవుతూ పండుగ చేసుకుంటున్నారు.

అనకాపల్లి జిల్లా ఎస్.రాయవరం మండలం ఏటికొప్పాక సహకార చక్కెర కర్మాగారంలోని శ్రామిక కార్మికులకు బకాయిలు చెల్లించేందుకు 13 కోట్ల రూపాయల నిధులు విడుదల చేస్తూ ప్రభుత్వం ఉత్తర్వులు ఇచ్చింది.

ఈ సందర్భంగా ఏటికొప్పాక షుగర్ ఫ్యాక్టరీ గేట్ ముందు శ్రామిక సంఘం నేతలు సోమవారం సాయంత్రం సమావేశం నిర్వహించారు.
శ్రామిక సంఘం జేఏసీ చీఫ్ సెక్రటరీ అల్లు నర్సింహామూర్తి, అధ్యక్షులు ఎర్రన్న నాయుడు, జనరల్ సెక్రటరీ గుండుబోగుల గోవిందరావు, కోశాధికారి సీ.హెచ్.ఎన్.జే.ప్రకాష్ కార్మికులతో కలిసి మాట్లాడారు. గత వైసీపీ ప్రభుత్వంలో షుగర్ ఫ్యాక్టరీ కార్మికులకు తీవ్ర అన్యాయం జరిగిందని, ఐదేళ్లపాటు బకాయిల కోసం ఎదురుచూశామని ఆవేదన వ్యక్తం చేశారు.

కూటమి ప్రభుత్వం వచ్చిన రెండేళ్లలోనే...
కూటమి ప్రభుత్వం అధికారంలోకి వచ్చిన రెండేళ్లలోనే తమ నిరీక్షణకు న్యాయం చేసిందని, 164 మంది కార్మికులకు బకాయిలు చెల్లించేందుకు జీవో విడుదల చేసిన ముఖ్యమంత్రి నారా చంద్రబాబు నాయుడు, ఉప ముఖ్యమంత్రి కొణిదల పవన్ కళ్యాణ్, శాసన సభ స్పీకర్ చింతకాయల అయ్యన్నపాత్రుడు, మంత్రి నారా లోకేష్, హోంమంత్రి వంగలపూడి అనితలకు శ్రామిక సంఘం తరపున ప్రత్యేక కృతజ్ఞతలు తెలియజేశారు. బకాయిలు విడుదల కావడంతో షుగర్ ఫ్యాక్టరీల శ్రామిక సంఘాలు ఆనందోత్సవం జరుపుకున్నాయి