91వ వార్డులో తిప్పల వంశీ ‘రింగ్’ సునామీ

గాజువాక, సూర్య : జీవీఎంసీ 91వ వార్డు రాజకీయ క్షేత్రంలో ఎన్నికల వాతావరణం ఒక్కసారిగా పతాక స్థాయికి చేరింది! పార్టీ బలాలు, అధిష్టానాల అండదండలు ఉన్న బడా రాజకీయ పార్టీల నాయకులకు నిద్రలేకుండా చేస్తూ... స్వతంత్ర అభ్యర్థి తిప్పల వంశీ రెడ్డి చేపట్టిన సమర భేరి 91వ వార్డులో రాజకీయ ప్రకంపనలు సృష్టించింది. శనివారం ఆయన తన ‘రింగ్’ గుర్తుపై చేపట్టిన తొలి ప్రచార హోరు కేవలం ఒక సాధారణ కార్యక్రమంగా కాకుండా, వార్డు చరిత్రలోనే మునుపెన్నడూ చూడని ఒక అఖండ ప్రజా ప్రభంజనంలా మారింది.

సాధారణంగా ఏ పార్టీ జెండా లేని ఒక ఇండిపెండెంట్ అభ్యర్థి ప్రచారానికి దిగితే పదుల సంఖ్యలోనే అనుచరులు ఉంటారనే పాత అంచనాలను వంశీ రెడ్డి పూర్తిగా తిరగరాశారు. 'ఒక స్వతంత్ర అభ్యర్థి పిలుపునిస్తే వేలాదిగా జనాలు తరలిరావడమేంటి?' అని ప్రధాన పార్టీల గుండెల్లో రైళ్లు పరిగెత్తించేలా ప్రతి వీధీ, ప్రతి గల్లీ ఒక జనసముద్రాన్ని తలపించింది. ముఖాముఖి పోరు అనుకున్న 91వ వార్డు సమీకరణాలను ఈ ఒక్క ప్రచార ప్రవాహం తలకిందులు చేసేసింది.

​"వీధివీధినా నీరాజనాలు... ప్రజా బలమే తిప్పల వంశీ అసలు సిసలు ఎజెండా!"

ఢంకా దెబ్బలు, ఈలల చప్పుళ్లు, యువత కేరింతల నడుమ తిప్పల వంశీ రెడ్డి ఇంటింటి ప్రచార పాదయాత్ర ముందుకు సాగుతుంటే వార్డు ప్రజలు బ్రహ్మరథం పట్టారు. ముఖ్యంగా ప్రతి ఇంటి వద్ద మహిళలు మంగళ హారతులు పడుతూ, పసుపు కుంకుమలు దిద్ది ఘన స్వాగతం పలికారు. చాలా చోట్ల మహిళలు, పెద్దలు ఆప్యాయంగా వంశీ రెడ్డిని ఆశీర్వదిస్తూ... తమ చేతికి ఉన్న ‘రింగ్’ను సెంటిమెంట్‌గా చూపిస్తూ "ఈసారి మన ఓటు... మన గుర్తే అయిన 'రింగ్'కే!" అని స్పష్టం చేయడం ప్రచారంలో ప్రధాన ఆకర్షణగా నిలిచింది.

కాలనీ వాసులు, వృద్ధులు, యువకులు పోటీపడుతూ వంశీ రెడ్డికి పూలమాలలు వేసి, అండగా ఉంటామని ఆత్మీయంగా ముచ్చటించారు. "మన భవిష్యత్తు... రింగ్ గుర్తు!", "మన కష్టాల్లో తోడుండే వంశీ రెడ్డికే మన మద్దతు!" అనే నినాదాలతో 91వ వార్డు నలుమూలలా మారుమోగిపోయింది. పార్టీ గుర్తుల కంటే ప్రజాదరణే మిన్న అని ఈ ప్రచారం చాటిచెప్పగా... తొలి అడుగులోనే 'రింగ్' గుర్తు సునామీలా దూసుకుపోతుండటంతో 91వ వార్డులో తిప్పల వంశీ రెడ్డి విజయం ఖాయమనే ధీమా స్పష్టంగా కనిపిస్తోంది!

రిపోర్టర్ : కోటి రెడ్డి, గాజువాక, విశాఖపట్నం.