వృద్ధులకు ఇంటి వద్దే పింఛన్లు అందించాలి - ఎంపీ గోడం నాగేష్‌

 

సూర్య గుడిహత్నూర్ : వృద్ధులు, నడవలేని స్థితిలో ఉన్నవారికి ఇబ్బందులు కలగకుండా ఇంటి వద్దే పింఛన్లు అందించాలని ఎంపీ గోడం నాగేష్‌ సూచించారు. శుక్రవారం గుడిహత్నూర్‌ మండలం తోషం గ్రామపంచాయతీ పరిధిలో పింఛన్ల పంపిణీ తీరును ఆయన పరిశీలించారు. స్థానిక పోస్టాఫీసులో పింఛన్లు తీసుకుంటున్న లబ్ధిదారులతో మాట్లాడి, సకాలంలో పింఛన్లు అందుతున్నాయా? వేలిముద్రల నమోదులో ఏమైనా ఇబ్బందులు ఎదురవుతున్నాయా? అని అడిగి తెలుసుకున్నారు.వృద్ధులు, నడవలేని స్థితిలో ఉన్నవారు పింఛన్ల కోసం పోస్టాఫీసుకు వచ్చి ఇబ్బందులు పడకుండా చూడాలని సంబంధిత బీపీఎం కళావతికి సూచించారు. అర్హులైన లబ్ధిదారుల ఇళ్లకు వెళ్లి పింఛన్లు పంపిణీ చేయాలని ఆదేశించారు. కార్యక్రమంలో సెక్యూరిటీ శ్రీనివాస్‌రెడ్డి, గ్రామస్తులు భీంరావు, సతీష్‌, కుంట నారాయణ, పింఛనుదారులు తదితరులు పాల్గొన్నారు.