చిన్నారులు, మహిళలకు టీకాల ప్రాముఖ్యతపై IMA అవగాహన కార్యక్రమాలు

సూర్య కరీంనగర్ : వరల్డ్ ఇమ్యూనైజేషన్ డే సందర్భంగా ఇండియన్ మెడికల్ అసోసియేషన్ (IMA) కరీంనగర్ ఆధ్వర్యంలో నగరంలోని వివిధ ఆసుపత్రుల్లో టీకాల ప్రాముఖ్యతపై అవగాహన కార్యక్రమాలు నిర్వహించారు. ముఖ్యంగా చిన్నపిల్లలు, కౌమార వయసు బాలబాలికలు, మహిళలకు అందించాల్సిన వివిధ రకాల టీకాలు, వాటి డోసులు, వాటి వల్ల కలిగే ప్రయోజనాలను పిల్లల వైద్యులు, స్త్రీ వైద్యులు, ఫిజీషియన్లు వివరించారు.శ్రీహీత పిల్లల ఆసుపత్రిలో నిర్వహించిన కార్యక్రమంలో డాక్టర్ నార్ల మహేందర్ నవజాత శిశువు నుంచి కౌమార దశ వరకు ఇవ్వాల్సిన వివిధ రకాల టీకాల ప్రాముఖ్యతను వివరించారు. ఈ కార్యక్రమానికి ముఖ్య అతిథిగా హాజరైన IMA కార్యదర్శి డాక్టర్ చల్లూరి విజయ్ కుమార్ క్యాచ్ అప్ వ్యాక్సినేషన్ గురించి వివరించారు. నిర్ణీత వయసులో టీకాలు తీసుకోలేకపోయిన వారికి తదుపరి సమయంలో కూడా టీకాలు అందించడం ద్వారా వ్యాధుల నుంచి రక్షణ పొందవచ్చని తెలిపారు.మరో అతిథిగా హాజరైన IMA ట్రెజరర్ డాక్టర్ ఆడెపు మానస హెచ్‌పీవీ (HPV) వ్యాక్సినేషన్‌తో పాటు గర్భిణీ స్త్రీలకు ఇవ్వాల్సిన టీకాలు, వాటి ప్రాముఖ్యతను వివరించారు.ఇదే తరహాలో పెటల్స్ నియో కేర్ హాస్పిటల్, సౌమ్య హాస్పిటల్, అమృత నర్సింగ్ హోమ్, ఫ్లోరెట్స్ చిల్డ్రన్ హాస్పిటల్‌లలో కూడా అవగాహన కార్యక్రమాలు నిర్వహించారు. టీకాలపై ప్రజల్లో అవగాహన పెంపొందించి, నివారించగల వ్యాధుల నుంచి చిన్నారులు, మహిళలను రక్షించడమే ఈ కార్యక్రమాల ముఖ్య ఉద్దేశమని నిర్వాహకులు తెలిపారు.