భద్రతే అభివృద్ధికి పునాది

అమీన్‌పూర్: భద్రతే అభివృద్ధికి పునాది అని, తెలంగాణ ప్రగతికి తెలంగాణ ప్రత్యేక రక్షణ దళం (టీజీఎస్‌పీఎఫ్‌) రక్షణ కవచంగా నిలుస్తోందని రాష్ట్ర ఉప ముఖ్యమంత్రి మల్లు భట్టి విక్రమార్క అన్నారు. అమీన్‌పూర్‌లో శుక్రవారం ఘనంగా నిర్వహించిన టీజీఎస్‌పీఎఫ్‌ ఆవిర్భావ దినోత్సవ వేడుకల్లో ఆయన ముఖ్య అతిథిగా పాల్గొని ప్రసంగించారు. 1991 అక్టోబర్ 23న ఏర్పాటైన ఈ దళం 36 ఏళ్లలో విశిష్ట సంస్థగా ఎదిగిందని కొనియాడారు.

ప్రస్తుతం తెలంగాణ సచివాలయం, శాసనసభ, హైకోర్టు, నాగార్జునసాగర్ ప్రాజెక్టు, ప్రధాన దేవాలయాలు, ప్రభుత్వ ఆసుపత్రులు, విద్యుత్ ఉత్పత్తి కేంద్రాలతో పాటు కేంద్ర ప్రభుత్వానికి చెందిన కీలకమైన 67 సంస్థలకు టీజీఎస్‌పీఎఫ్‌ రక్షణ కల్పిస్తోందని తెలిపారు. దాదాపు రెండు వేల మంది సిబ్బంది ఈ బాధ్యతలను సమర్థంగా నిర్వర్తిస్తున్నారని ప్రశంసించారు. 'ప్రగతికి రక్షణ' అనే దళం నినాదం ఎంతో అర్థవంతమైనదని, పెట్టుబడులు, పరిశ్రమల స్థాపనకు పటిష్టమైన భద్రత ఎంతో అవసరమని పేర్కొన్నారు.

ప్రత్యేకించి యాదాద్రి, కొత్తగూడెం, భద్రాద్రి వంటి విద్యుత్ ఉత్పత్తి కేంద్రాల వద్ద సిబ్బంది అందిస్తున్న సేవలు అభినందనీయమని విద్యుత్ శాఖ మంత్రి కూడా అయిన భట్టి విక్రమార్క పేర్కొన్నారు. విద్యుత్ వెలుగులు అందరికీ కనిపించినా, వాటి వెనుక భద్రతా సిబ్బంది చేసే కృషి వెలకట్టలేనిదని అన్నారు. మారుతున్న కాలానికి అనుగుణంగా ఆధునిక నిఘా వ్యవస్థలు, డ్రోన్లు, కృత్రిమ మేధ, సైబర్ భద్రత వంటి సాంకేతిక పరిజ్ఞానంలో సిబ్బంది నిరంతరం నైపుణ్యాలను పెంపొందించుకోవాలని సూచించారు. భద్రతా దళాల బలం కేవలం ఆయుధాల్లోనే కాక, సిబ్బంది క్రమశిక్షణ, నిజాయితీ, సమయస్ఫూర్తిలోనే ఉంటుందని స్పష్టం చేశారు. టీజీఎస్‌పీఎఫ్‌ సిబ్బంది సంక్షేమానికి, వారి వృత్తిపరమైన అభివృద్ధికి ప్రభుత్వం పూర్తి ప్రాధాన్యం ఇస్తుందని హామీ ఇచ్చారు.