విద్యుత్ కోతలపై బిజెపి నిరసన

విద్యుత్ కోతలపై బీజేపీ నిరసన

24 గంటల నాణ్యమైన విద్యుత్ సరఫరా చేయాలని డిమాండ్

గణపురం, సెప్టెంబర్ 30 మేజర్ న్యూస్ సూర్య: తెలంగాణలో విద్యుత్ కోతలను నిరసిస్తూ బీజేపీ రాష్ట్ర అధ్యక్షుడు రామచంద్రరావు పిలుపు మేరకు గణపురం మండల కేంద్రంలోని విద్యుత్ ఉపకేంద్రం ఎదుట బీజేపీ నాయకులు బుధవారం నిరసన చేపట్టారు. ఈ సందర్భంగా బీజేపీ మండల కన్వీనర్ మంద మహేష్ మాట్లాడుతూ వ్యవసాయానికి 24 గంటల నాణ్యమైన విద్యుత్ సరఫరా చేయాలని, రైతులకు ఎదురవుతున్న విద్యుత్ కోతలను వెంటనే నిలిపివేయాలని డిమాండ్ చేశారు.

విద్యుత్ సరఫరాలో అంతరాయాలతో రైతులు పంటలకు నీరు అందించలేక ఇబ్బందులు పడుతున్నారని, అరకొర త్రీఫేజ్ సరఫరాతో మోటార్లు కాలిపోతున్నాయని ఆవేదన వ్యక్తం చేశారు. తెలంగాణలో ఫసల్ బీమా పథకాన్ని వెంటనే అమలు చేయాలని, రైతులకు ఇచ్చిన హామీలను నెరవేర్చాలని డిమాండ్ చేశారు. విద్యుత్ కోతలు కొనసాగితే ఆందోళనలను మరింత ఉధృతం చేస్తామని హెచ్చరించారు.

ఈ కార్యక్రమంలో బీజేపీ సీనియర్ నాయకులు సోమ దామోదర్, బోద్దుల మొగిలి, మాదాస మొగిలిగౌడ్, నాయకపు నరసింహారాములు, మాడిశెట్టి సాంబశివుడు, వడ్డం రాజశేఖర్, వేముల రమేష్ గౌడ్, రైతులు తదితరులు పాల్గొన్నారు.