తాండూరులో స్పెషల్ డ్రైవ్.. అభివృద్ధి పనులకు వేగం పెంచాలి

పట్టణ సమగ్రాభివృద్ధికి నిధుల కొరత ఉండదు.. ఎమ్మెల్యే మనోహర్ రెడ్డి

తాండూరు, మేజర్ న్యూస్,(సెప్టెంబర్ 29):
తాండూరు పట్టణ సమగ్రాభివృద్ధికి ప్రభుత్వం అందిస్తున్న నిధులను సద్వినియోగం చేసుకుంటూ అభివృద్ధి పనులను మరింత వేగవంతం చేయాలని తాండూరు ఎమ్మెల్యే బుయ్యని మనోహర్ రెడ్డి అధికారులను ఆదేశించారు. మంగళవారం ఉదయం తాండూరు పురపాలక సంఘం ఆధ్వర్యంలో నిర్వహించిన స్పెషల్ డ్రైవ్ కార్యక్రమంలో ఎమ్మెల్యే పాల్గొన్నారు.మున్సిపల్ చైర్‌పర్సన్ నీరజ బాల్‌రెడ్డి, వైస్ చైర్మన్ రజాక్, మున్సిపల్ కమిషనర్ రాకేష్ రెడ్డి, పలువురు కౌన్సిలర్లు, పార్టీ నాయకులతో కలిసి ఎమ్మెల్యే స్పెషల్ డ్రైవ్‌లో పాల్గొన్నారు. పట్టణంలోని 1వ వార్డు నుంచి 6వ వార్డు వరకు వివిధ కాలనీల్లో పర్యటిస్తూ స్థానికులతో మాట్లాడారు.

ఈ సందర్భంగా ఆయా వార్డుల్లో నెలకొన్న సమస్యలు, ప్రజలు ఎదుర్కొంటున్న ఇబ్బందులను ఎమ్మెల్యే స్వయంగా అడిగి తెలుసుకున్నారు. పారిశుధ్యం, మౌలిక వసతులు, రోడ్లు, డ్రైనేజీ తదితర అంశాలపై స్థానికుల నుంచి వివరాలు సేకరించారు. ప్రజలకు ఇబ్బందులు కలగకుండా సమస్యలను గుర్తించి పరిష్కరించేందుకు అధికారులు సమన్వయంతో పనిచేయాలని సూచించారు.తాండూరు పట్టణ సమగ్ర అభివృద్ధికి అవసరమైన నిధులను సమకూర్చేందుకు కృషి చేస్తామని, నిధుల కొరత లేకుండా అభివృద్ధి పనులను ముందుకు తీసుకెళ్తామని ఎమ్మెల్యే మనోహర్ రెడ్డి తెలిపారు. ఇప్పటికే చేపట్టిన పనులను వేగవంతం చేయడంతో పాటు, ప్రజలకు అవసరమైన మౌలిక సదుపాయాల కల్పనపై ప్రత్యేక దృష్టి సారించాలని అధికారులకు సూచించారు.ఎమ్మెల్యే వివిధ కాలనీల్లో పర్యటించి ప్రజలతో నేరుగా మాట్లాడటంతో స్థానికుల నుంచి మంచి స్పందన లభించింది. కార్యక్రమంలో మున్సిపల్ శాఖ అధికారులు, ప్రజాప్రతినిధులు, పార్టీ నాయకులు, కార్యకర్తలు తదితరులు పాల్గొన్నారు.రిపోర్టర్ పంజుగుల రామచందర్.