సమయస్ఫూర్తితో స్పందించిన 108 సిబ్బంది

యువతికి తప్పిన ప్రాణాపాయం 

మేడ్చల్ ,మేజర్ న్యూస్,(సెప్టెంబర్ 22): శామీర్‌పేట మండలం మజీద్‌పూర్ గ్రామంలో ఆత్మహత్యకు ప్రయత్నించిన 18 ఏళ్ల యువతిని సకాలంలో గుర్తించి, 108 సిబ్బంది సమయస్ఫూర్తితో స్పందించడంతో ప్రాణాపాయం తప్పింది. గ్రామానికి చెందిన మంజుల, నరసింహుల కుమార్తె రొండ్ల భావన (18) మంగళవారం సాయంత్రం సుమారు 7.30 గంటల సమయంలో ఉరివేసుకుని ఆత్మహత్యకు ప్రయత్నించినట్లు కుటుంబ సభ్యులు తెలిపారు.భావనను గమనించిన తల్లిదండ్రులు వెంటనే 108 అంబులెన్స్‌కు సమాచారం అందించారు. సమాచారం అందిన వెంటనే శామీర్‌పేట 108 అంబులెన్స్ సిబ్బంది ఈఎంటీ యాదమ్మ, పైలట్ శాంతికుమార్ హుటాహుటిన ఘటనాస్థలానికి చేరుకున్నారు. డాక్టర్ చక్రవర్తి సూచనల మేరకు యువతికి అక్కడికక్కడే ప్రథమ చికిత్స అందించి, తదుపరి వైద్య చికిత్స కోసం సమీపంలోని ఆసుపత్రికి తరలించారు.సకాలంలో 108 సిబ్బంది స్పందించి అత్యవసర వైద్య సహాయం అందించడంతో భావనను సురక్షితంగా ఆసుపత్రికి తరలించగలిగామని కుటుంబ సభ్యులు తెలిపారు. తమ కుమార్తెను కాపాడేందుకు వెంటనే స్పందించిన ఈఎంటీ యాదమ్మ, పైలట్ శాంతికుమార్‌కు భావన తల్లిదండ్రులు కృతజ్ఞతలు తెలిపారు.ఆపద సమయంలో ఒక్క ఫోన్‌కాల్‌తో స్పందించి అత్యవసర వైద్య సేవలు అందిస్తున్న 108 సిబ్బంది సేవల ప్రాధాన్యతను ఈ ఘటన మరోసారి చాటిచెప్పింది.