ప్రకృతి వ్యవసాయంలో జగిత్యాల జిల్లాను ముందంజలో నిలిపేందుకు సఖీలు కృషి చేయాలి

 మేడిపల్లి శిక్షణలో జిల్లా వ్యవసాయ శాఖ అధికారి భాస్కర్

 కృషి సఖిలకు 5రోజుల శిక్షణ కార్యక్రమం..

సూర్య మేడిపల్లి:

ప్రకృతి వ్యవసాయంలో జగిత్యాల జిల్లాను ముందంజలో నిలిపేందుకు సఖీలు సమర్థవంతంగా కృషి చేయాలని  జిల్లా వ్యవసాయ శాఖ అధికారి భాస్కర్ తెలిపారు.జగిత్యాల జిల్లా మేడిపల్లి మండలంలోని రైతు వేదికలో కృషి సఖిలకు 5రోజుల శిక్షణ కార్యక్రమాన్ని జిల్లా వ్యవసాయ అధికారి వి.భాస్కర్ ప్రారంభించారు.ఈ సందర్భంగా జిల్లా వ్యవసాయ అధికారి మాట్లాడుతూ జగిత్యాల జిల్లాలో నేషనల్ మిషన్ ఆన్ నేచురల్ ఫార్మింగ్ కార్యక్రమం ద్వారా 2,875మంది రైతులను,46మంది కృషి సఖిలను,23క్లస్టర్లలో అనుసంధానం చేసి ప్రకృతి వ్యవసాయంపై అవగాహన,శిక్షణ కార్యక్రమాలు నిర్వహిస్తున్నట్లు తెలిపారు.ఒక్కో క్లస్టర్‌లో సుమారు 125మంది రైతులను గుర్తించి,వారికి ప్రకృతి వ్యవసాయ పద్ధతులపై అవగాహన కల్పిస్తున్నట్లు వివరించారు.ఈ 5రోజుల శిక్షణలో మట్టి నాణ్యత పరీక్షలు, ప్రకృతి వ్యవసాయంలో ఉపయోగించే జీవామృతం,బీజామృతం, ఘనజీవామృతం,నీమాస్త్రం, అగ్ని అస్త్రం, బ్రహ్మాస్త్రం,దశపర్ణి కషాయం వంటి ద్రావణాలు,కషాయాల తయారీ, వినియోగ విధానాలను కృషి సఖిలకు వివరించారు. అలాగే ప్రకృతి వ్యవసాయం,సేంద్రియ వ్యవసాయం మధ్య ఉన్న తేడాలను కూడా వివరించారు.ప్రతి కృషి సఖి గ్రామస్థాయిలో రైతులతో సమన్వయం చేసుకుంటూ ఎన్ ఎం ఎఫ్ పథకం లక్ష్యాలు,ప్రకృతి వ్యవసాయ పద్ధతులు,వాటి ప్రయోజనాలను రైతులకు చేరవేయాలని జిల్లా వ్యవసాయ అధికారి సూచించారు.డిప్యూటీ డైరెక్టర్ సుధాకర్ భూమిలోని 16ముఖ్యమైన పోషక మూలకాల గురించి కృషి సఖిలకు వివరించారు.జిల్లా నేచురల్ ఫార్మింగ్ నోడల్ ఆఫీసర్ ఎస్. శ్రీనివాస్ మాట్లాడుతూ ప్రకృతి వ్యవసాయ పద్ధతుల ద్వారా భూమిలో సేంద్రియ కర్బనాన్ని పెంచి నేల నాణ్యతను, సారవంతతను మెరుగుపరచవచ్చని తెలిపారు. గోమయం, జీవామృతం, ఘనజీవామృతం వంటి సహజ ఇన్‌పుట్ల వినియోగం ద్వారా నేల ఆరోగ్యాన్ని మెరుగుపరచే విధానాలను వివరించారు. అలాగే కృషి సఖిల విధులు, బాధ్యతలు, కృషి మ్యాప్ యాప్‌లో పంటల నమోదు, ఫీల్డ్ డెమో కార్యక్రమాల గురించి వివరించారు.ఈ సందర్భంగా జన వికాస గ్రామీణ అభివృద్ధి సంస్థ కార్యదర్శి పెండ్లి సంపత్ కుమార్ మాట్లాడుతూ ఐదు రోజుల శిక్షణను కృషి సఖిలు సద్వినియోగం చేసుకొని,శిక్షణలో నేర్చుకున్న ప్రకృతి వ్యవసాయ పద్ధతులను గ్రామస్థాయిలో రైతులకు చేరవేయాలని సూచించారు. రైతులు తక్కువ ఖర్చుతో,నేల ఆరోగ్యాన్ని కాపాడుకుంటూ ప్రకృతి వ్యవసాయాన్ని అవలంబించేలా కృషి సఖిలు అవగాహన కల్పించాలని తెలిపారు.ఈ కార్యక్రమంలో మేడిపల్లి మండల వ్యవసాయ అధికారి షహీద్,కృషి సఖిలు, జన వికాస గ్రామీణ అభివృద్ధి సంస్థ ప్రోగ్రాం కోఆర్డినేటర్ పెసరి రాజు తదితరులు పాల్గొన్నారు.