టెలికాం వినియోగదారులకు గుడ్‌న్యూస్-నెట్‌వర్క్ అనుభవ్ ప్లాట్‌ఫారమ్‌ను ప్రారంభించిన ట్రాయ్
సూర్య జాతీయ డెస్క్: దేశవ్యాప్తంగా టెలికాం వినియోగదారులకు మరింత మెరుగైన సేవలను అందించే దిశగా టెలికాం రెగ్యులేటరీ అథారిటీ ఆఫ్ ఇండియా కీలకమైన ముందడుగు వేసింది. మొబైల్ మరియు బ్రాండ్‌బ్యాండ్ నెట్‌వర్క్ పనితీరును క్షణ్ణంగా విశ్లేషించేందుకు అలాగే ఆన్‌లైన్ ద్వారా డీఎండీ సేవలను సులభంగా పొందేందుకు వీలుగా ప్రత్యేకంగా రూపొందించిన నెట్‌వర్క్ అనుభవ్ ప్లాట్‌ఫారమ్‌ను అధికారికంగా ప్రారంభించడం జరిగింది. టెలికాం రంగానికి సంబంధించిన వివిధ అంశాలపై పారదర్శకతను పెంచడంతో పాటు వినియోగదారులు ఎదుర్కొంటున్న నెట్‌వర్క్ సమస్యలకు సత్వర పరిష్కారం చూపడమే లక్ష్యంగా ఈ నూతన వేదికను అందుబాటులోకి తీసుకువచ్చారు.
ఈ వినూత్న ప్లాట్‌ఫారమ్ ద్వారా వినియోగదారులు తాము నివసించే ప్రాంతాలలో మొబైల్ డేటా వేగం, కాల్ నాణ్యత అలాగే ఇంటర్నెట్ కనెక్టివిటీకి సంబంధించిన వాస్తవ సమాచారాన్ని మ్యాపింగ్ ద్వారా సులభంగా తెలుసుకునే వెసులుబాటు లభిస్తుంది. ట్రాయ్ సంస్థకు చెందిన మై స్పీడ్ మరియు మై కాల్ అప్లికేషన్ల ద్వారా వినియోగదారులు నమోదు చేసే పరీక్షా ఫలితాలు మరియు స్వతంత్ర డ్రైవ్ టెస్ట్ డేటాను ఈ జియోస్పేషియల్ డాష్‌బోర్డ్ సమగ్రపరుస్తుంది. దీనివల్ల వివిధ ప్రాంతాలలో వేర్వేరు టెలికాం ఆపరేటర్ల పనితీరు ఎలా ఉందనే దానిపై వినియోగదారులకు పూర్తి స్థాయి స్పష్టత లభిస్తుందని అధికారులు వెల్లడించారు.
టెలికాం ఆపరేటర్లు తమ నెట్‌వర్క్‌లను మరింత ఆప్టిమైజ్ చేసుకోవడానికి, సిగ్నల్ సమస్యలు ఎక్కువగా ఉన్న ప్రాంతాలను గుర్తించి తగిన చర్యలు చేపట్టడానికి ఈ డాష్‌బోర్డ్ ఎంతగానో దోహదపడుతుంది. కేవలం నెట్‌వర్క్ వేగాలను అంచనా వేయడమే కాకుండా, అవాంఛిత వాణిజ్య కాల్స్ మరియు సందేశాలను అడ్డుకునేందుకు వీలుగా డీఎండీ సేవలను వెబ్ ఇంటర్‌ఫేస్ ద్వారా నేరుగా నిర్వహించుకునే సదుపాయాన్ని కూడా ఈ పోర్టల్ కల్పిస్తోంది. వినియోగదారులు తమ మొబైల్ యాప్‌లపై మాత్రమే ఆధారపడకుండా అధికారిక వెబ్‌సైట్ ద్వారా నేరుగా ప్రాధాన్యతలను సెట్ చేసుకోవడం మరియు ఫిర్యాదుల స్థితిని ట్రాక్ చేయడం సులభతరం చేయబడింది.
నెట్‌వర్క్ నాణ్యతను మెరుగుపరిచే ప్రభుత్వ యత్నాల్లో పౌరులను కూడా భాగస్వామ్యం చేయాలనే ఉద్దేశంతో ఈ ప్లాట్‌ఫారమ్‌ను రూపొందించినట్లు ట్రాయ్ ఛైర్మన్ అనిల్ కుమార్ లాహోటి స్పష్టం చేశారు. వినియోగదారులు తమ ప్రాంతంలోని నెట్‌వర్క్ పనితీరును క్రమం తప్పకుండా టెస్ట్ చేయడం ద్వారా డిజిటల్ మౌలిక వసతుల అభివృద్ధికి పరోక్షంగా సహకరించవచ్చని ఆయన పిలుపునిచ్చారు. దేశవ్యాప్తంగా టెలికాం రంగంలో పారదర్శకతను పెంపొందించే ఈ సేవలను వినియోగదారులు సద్వినియోగం చేసుకోవాలని అధికారులు కోరుతున్నారు.
