మృతుల కుటుంబాలకు రూ.2 లక్షలు,గాయపడిన వారికి రూ.50 వేల పరిహారం ప్రకటించిన ప్రధాని మోదీ!

సూర్య జాతీయ డెస్క్: ఉత్తర ప్రదేశ్‌లోని యమునా ఎక్స్‌ప్రెస్‌వేపై జరిగిన ఘోర బస్సు ప్రమాదం పట్ల ప్రధాన మంత్రి నరేంద్ర మోదీ తీవ్ర దిగ్భ్రాంతి వ్యక్తం చేశారు. ప్రమాదంలో ప్రాణాలు కోల్పోయిన ప్రయాణికుల కుటుంబాలకు ప్రధాని జాతీయ సహాయ నిధి (PMNRF) నుంచి రూ.2 లక్షల చొప్పున పరిహారం (ఎక్స్‌గ్రేషియా) అందించనున్నట్లు పిఎంవో ప్రకటించింది. అలాగే ప్రమాదంలో తీవ్రంగా గాయపడిన బాధితులకు రూ.50 వేల చొప్పున ఆర్థిక సాయం అందజేస్తామని ప్రధాని తెలిపారు.

గురువారం తెల్లవారుజామున ఢిల్లీ నుంచి బీహార్ వెళ్తున్న స్లీపర్ బస్సు గ్రేటర్ నోయిడాలోని జేవార్ పోలీస్ స్టేషన్ పరిధి, 33వ మైలురాయి సమీపంలోకి రాగానే ఒక్కసారిగా మంటలు చెలరేగి ప్రమాదానికి గురైంది. ఈ దుర్ఘటనపై సోషల్ మీడియా వేదికగా స్పందించిన ప్రధాని మోదీ.. "ఉత్తర ప్రదేశ్‌లోని గ్రేటర్ నోయిడా వద్ద జరిగిన బస్సు ప్రమాదంలో ప్రయాణికులు ప్రాణాలు కోల్పోవడం నన్ను తీవ్రంగా కలచివేసింది. మృతుల కుటుంబాలకు నా సానుభూతి తెలియజేస్తున్నాను. గాయపడిన వారు త్వరగా కోలుకోవాలని ప్రార్థిస్తున్నాను" అని పేర్కొన్నారు. ఈ ప్రమాదంపై సమగ్ర సహాయక చర్యలు చేపట్టాలని, బాధితులకు వైద్య సదుపాయాలు తక్షణమే అందించాలని ఉత్తర ప్రదేశ్ ముఖ్యమంత్రి యోగి ఆదిత్యనాథ్ ఇప్పటికే అధికారులను ఆదేశించారు.