ఇస్రో ప్రైవేటీకరణ లేదు: పూర్తి ప్రభుత్వ అధీనంలోనే ఉంటుందన్న ఛైర్మన్ వి. నారాయణన్!

 సూర్య సైన్స్ & టెక్నాలజీ బ్యూరో, బెంగళూరు: భారత అంతరిక్ష పరిశోధన సంస్థ (ISRO) ప్రైవేటీకరణ వైపు అడుగులు వేస్తోందంటూ వస్తున్న ప్రచారాలు, ఉద్యోగ సంఘాల ఆందోళనలపై ఇస్రో ఛైర్మన్ డాక్టర్ వి. నారాయణన్ పూర్తి స్పష్టతనిచ్చారు. ఇస్రో ఎన్నటికీ ప్రైవేటీకరణ కాదని, ఇది పూర్తిగా భారత ప్రభుత్వ ఆధ్వర్యంలోనే కొనసాగుతుందని ఆయన తేల్చిచెప్పారు. అంతరిక్ష రంగంలో ప్రైవేట్ సంస్థలు, స్టార్టప్‌ల భాగస్వామ్యాన్ని పెంచడం అంటే ఇస్రోను ప్రైవేటీకరించడం కాదని, దేశ అంతరిక్ష ఆర్థిక వ్యవస్థను  విస్తరించడమే లక్ష్యమని స్పష్టం చేశారు.

పీఎస్ఎల్‌వీ, జీఎస్‌ఎల్‌వీలలో 75 నుంచి 80 శాతం బడ్జెట్ ప్రైవేట్ రంగానికే:
భారత అంతరిక్ష యాత్రల్లో ప్రైవేట్ పరిశ్రమల పాత్ర ఎప్పటినుంచో కీలకమని ఇస్రో ఛైర్మన్ వివరించారు. "ఒక పీఎస్ఎల్‌వీ (PSLV) లేదా జీఎస్‌ఎల్‌వీ (GSLV) రాకెట్ నింగిలోకి దూసుకెళ్తోందంటే.. అందులో ప్రతి ఒక్కటీ కేవలం ఇస్రో మాత్రమే తయారు చేయదు. మన మొత్తం రాకెట్ బడ్జెట్‌లో దాదాపు 75% నుంచి 80% నిధులు భారతీయ ప్రైవేట్ పరిశ్రమలకే వెళ్తాయి. ప్రస్తుతం దాదాపు 450కి పైగా ప్రైవేట్ సంస్థలు ఇస్రోతో కలిసి పనిచేస్తున్నాయి" అని ఆయన గుర్తుచేశారు. దేశంలో ఏటా దాదాపు 50 ప్రయోగ వాహనాల డిమాండ్ ఏర్పడుతున్న నేపథ్యంలో ప్రైవేట్ భాగస్వామ్యం అనివార్యమని ఆయన పేర్కొన్నారు.

అధునాతన పరిశోధనలపైనే ఇస్రో దృష్టి:
భారత అంతరిక్ష విధానం  ప్రకారం సాధారణ ఉపగ్రహాల తయారీ, రాకెట్ల అసెంబ్లింగ్ వంటి రొటీన్ పనులను దేశీయ పరిశ్రమలకు బదిలీ చేయడం ద్వారా, ఇస్రో తన పూర్తి శాస్త్రీయ వనరులను గగన్‌యాన్ (మానవ సహిత అంతరిక్ష యాత్ర), డీప్-స్పేస్ పరిశోధనలు, భవిష్యత్ తరం లాంచ్ వెహికల్స్ (NGLV) మరియు భారతీయ అంతరిక్ష స్టేషన్ (BAS) వంటి సంక్లిష్టమైన ప్రాజెక్టులపై కేంద్రీకరించగలదని నారాయణన్ వివరించారు. ఈ సంస్కరణలు దేశంలో కొత్త ఉద్యోగాలను సృష్టించి ఆర్థిక వ్యవస్థను బలోపేతం చేస్తాయని ఆయన తెలిపారు. రాబోయే ఎన్‌వీఎస్-03 (NVS-03) నావిగేషన్ ఉపగ్రహ ప్రయోగం షెడ్యూల్ ప్రకారమే జరుగుతుందని వెల్లడించారు.