ట్రంప్ ప్రభుత్వ ఆరోపణలను ఖండించిన టెక్ దిగ్గజం!
గ్రీన్ కార్డ్ ప్రోగ్రామ్ సస్పెన్షన్‌పై మైక్రోసాఫ్ట్ తొలి స్పందన: ఆ ఉద్యోగులు కేవలం ఒక శాతమే..
సూర్య అంతర్జాతీయ డెస్క్: హెచ్-1బీ (H-1B) వీసాల ద్వారా విదేశీ ఉద్యోగులకు శాశ్వత నివాస హోదా కల్పించే 'పర్మనెంట్ లేబర్ సర్టిఫికేషన్' (పీఈఆర్‌ఎం - PERM / గ్రీన్ కార్డ్ స్పాన్సర్‌షిప్) ప్రోగ్రామ్ నుంచి తమను తాత్కాలికంగా సస్పెండ్ చేస్తూ ట్రంప్-వాన్స్ సర్కారు తీసుకున్న నిర్ణయంపై గ్లోబల్ టెక్ దిగ్గజం 'మైక్రోసాఫ్ట్' (Microsoft) అధికారికంగా స్పందించింది. యూఎస్ ఉపాధ్యక్షుడు జేడీ వాన్స్ చేసిన వీసా మోసాలు, స్థానిక అమెరికన్లను తొలగించి విదేశీయులను తెస్తున్నారన్న ఆరోపణలను మైక్రోసాఫ్ట్ తోసిపుచ్చింది.
ఈ వివాదంపై వివరణ ఇస్తూ.. గత ఆర్థిక సంవత్సరంలో తాము సమర్పించిన దాదాపు 6,000 హెచ్-1బీ దరఖాస్తుల్లో 80 శాతం దరఖాస్తులు ఇప్పటికే మైక్రోసాఫ్ట్‌లో పనిచేస్తున్న ప్రస్తుత ఉద్యోగుల వీసా గడువు పొడిగింపు లేదా స్టేటస్ మార్పు కోసమే దాఖలు చేశామని, కొత్తవారిని నియమించుకోవడానికి కాదని స్పష్టం చేసింది. ఇక మిగిలిన కొత్త నియామకాల పిటిషన్లు కూడా అప్పటికే అమెరికాలో చట్టబద్ధంగా నివసిస్తూ తమ వద్ద ఉద్యోగంలో చేరిన వ్యక్తుల కోసమేనని పేర్కొంది. ఇలాంటి వారు తమ మొత్తం యూఎస్ శ్రామిక శక్తిలో కేవలం 1 శాతం మాత్రమే ఉంటారని, వారు దేశంలోకి కొత్తగా దిగుమతి అయినవారు కాదని వెల్లడించింది.
మైక్రోసాఫ్ట్ సంస్థలో అత్యధిక శాతం మంది ఉద్యోగులు అమెరికన్ పౌరులేనని, హెచ్-1బీ కేటగిరీ కఠిన నిబంధనలను పూర్తిస్థాయిలో సంతృప్తి పరిచే అసాధారణ నైపుణ్యాలు గల నిపుణులకు మాత్రమే తాము పిటిషన్లు దాఖలు చేస్తామని యాజమాన్యం స్పష్టం చేసింది. అంతేకాకుండా సమానమైన పని చేసే స్థానిక ఉద్యోగులకు ఎంత వేతనం చెల్లిస్తామో, హెచ్-1బీ ఉద్యోగులకూ అంతే సమానమైన, మార్కెట్లో అత్యున్నత స్థాయి వేతనాలను అందిస్తున్నామని తెలిపింది. ట్రంప్-వాన్స్ పరిపాలనా యంత్రాంగానికి ఈ అంశాలపై పూర్తిస్థాయిలో వాస్తవ సమాచారాన్ని, నివేదికలను సమర్పించేందుకు సిద్ధంగా ఉన్నామని మైక్రోసాఫ్ట్ స్పష్టం చేసింది.
