హోర్ముజ్ జలసంధిలో భారీ ఎల్‌పీజీ నౌకపై ఇరాన్ దాడి
సూర్య అంతర్జాతీయ డెస్క్: వ్యూహాత్మక హోర్ముజ్ జలసంధిలో ఉద్రిక్తతలు మరోసారి తారాస్థాయికి చేరాయి. టెహ్రాన్ అనుమతించని 'అనధికారిక మార్గం' (ఇల్లీగల్ రూట్) ద్వారా హోర్ముజ్ జలసంధిని దాటేందుకు ప్రయత్నించిన భారీ ద్రవీకృత పెట్రోలియం గ్యాస్ (ఎల్‌పీజీ) నౌకపై దాడి చేసినట్లు ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) అధికారికంగా ప్రకటించింది. ఈ దాడి కారణంగా ఆ భారీ కార్గో నౌక ఇంజిన్ రూమ్, ప్రొపల్షన్ వ్యవస్థలో భారీ ఎత్తున మంటలు చెలరేగాయని ఇరాన్ సైన్యం వెల్లడించింది.
ఇరాన్ అధికారిక వార్తా సంస్థల కథనం ప్రకారం.. 'నట్‌విట్' సంస్థకు చెందిన 'ఎన్‌వీ సన్‌షైన్' (NV Sunshine) అనే భారీ ఎల్‌పీజీ క్యారియర్ నౌక హోర్ముజ్ జలసంధికి దక్షిణాన ఉన్న అనధికార మార్గంలో ప్రయాణించేందుకు యత్నించింది. హోర్ముజ్ జలసంధి పర్యవేక్షణ, రవాణా నిర్వహణను తమ అధీనంలోకి తీసుకున్నామని పేర్కొన్న ఐఆర్‌జీసీ నౌకాదళం.. నిబంధనలను ఉల్లంఘించి ప్రయాణించినందుకే ఆ నౌకను లక్ష్యంగా చేసుకుని దాడి చేసినట్లు స్పష్టం చేసింది.
ప్రాంతీయ సముద్ర రవాణాలో ఉద్రిక్తతలు పెరగడానికి అమెరికా దూకుడు సైనిక చర్యలే ప్రధాన కారణమని ఇరాన్ సైన్యం ఆరోపించింది. తమ జలాల్లో శత్రు బలగాల ఉనికిని లేదా తమ నిర్వహణకు ఆటంకం కలిగించే ఎలాంటి చర్యలనైనా ఉపేక్షించబోమని హెచ్చరించింది. అంతేకాకుండా, అనధికార మార్గాల్లో ప్రయాణించే నౌకలపై చర్యలు కేవలం హోర్ముజ్ జలసంధికే పరిమితం కావని, ప్రాంతంలో ఎక్కడైనా సరే వాటిని వెంబడించి కఠిన చర్యలు తీసుకుంటామని ఐఆర్‌జీసీ హెచ్చరికలు జారీ చేసింది. ప్రపంచ ఇంధన రవాణాలో అత్యంత కీలకమైన హోర్ముజ్ జలసంధిలో జరిగిన ఈ దాడి అంతర్జాతీయంగా ముడి చమురు, గ్యాస్ సరఫరా వ్యవస్థలపై తీవ్ర ఆందోళనలను రేకెత్తిస్తోంది.
