తైవాన్ చుట్టూ చైనా భారీ విన్యాసాలు..తూర్పు ఆసియాలో మళ్లీ యుద్ధ మేఘాలు
సూర్య అంతర్జాతీయ డెస్క్: తూర్పు ఆసియా ప్రాంతంలో మరోసారి తీవ్ర యుద్ధ భయాలు నెలకున్నాయి. స్వయంప్రతిపత్తి కలిగిన తైవాన్ ప్రాంతాన్ని తమ భూభాగంలో కలిపేసుకునేందుకు ప్రయత్నిస్తున్న చైనా, ఆ ద్వీపం చుట్టూ వరుసగా ప్రత్యక్ష కాల్పుల సైనిక విన్యాసాలను (లైవ్-ఫైర్ డ్రిల్స్) ప్రారంభించింది. చైనా పీపుల్స్ లిబరేషన్ ఆర్మీ (పీఎల్‌ఏ) జరుపుతున్న ఈ అనుమానాస్పద, ప్రమాదకర విన్యాసాలను అత్యంత నిశితంగా పర్యవేక్షిస్తున్నామని, ఎలాంటి పరిస్థితులనైనా ఎదుర్కొనేందుకు సన్నద్ధంగా ఉన్నామని తైవాన్ రక్షణ మంత్రిత్వ శాఖ సోమవారం అధికారిక ప్రకటన విడుదల చేసింది.
ఇటీవల తైవాన్ జాతీయ దినోత్సవం సందర్భంగా ఆ దేశ అధ్యక్షుడు లై చింగ్-తే చేసిన ప్రసంగంపై చైనా తీవ్ర ఆగ్రహం వ్యక్తం చేసింది. తైవాన్ స్వేచ్ఛను, ప్రజల ఉనికిని కాపాడుకుంటామని, ఎట్టి పరిస్థితుల్లోనూ లొంగిపోయేది లేదని లై చింగ్ స్పష్టం చేశారు. అయితే లై వ్యాఖ్యలను తైవాన్ విలాసవంతమైన విచ్ఛిన్నకర ఆలోచనలుగా అభివర్ణించిన చైనా రక్షణ మంత్రిత్వ శాఖ, బలప్రదర్శన ద్వారా వేర్పాటువాద శక్తులను నిరోధించడం సమర్థనీయమేనని పేర్కొంది. ఈ ఉద్రిక్తతల నేపథ్యంలో చైనా యుద్ద విమానాలు, నౌకలు తైవాన్ జలసంధి సరిహద్దులను దాటుతూ నిరంతరం నిఘా వేస్తున్నాయి.
చైనా బలగాలు తైవాన్ చుట్టూ జరుపుతున్న ఈ భారీ విన్యాసాలు కేవలం సాధారణ శిక్షణ కాదని, సైనిక దిగ్బంధం లేదా హఠాత్ దాడికి ముందస్తు సన్నాహాలేనని రక్షణ రంగ నిపుణులు హెచ్చరిస్తున్నారు. తైవాన్ జాతీయ భద్రతను కాపాడేందుకు ఆ దేశ వైమానిక, నౌకాదళం మరియు తీరప్రాంత క్షిపణి వ్యవస్థలు పూర్తి అప్రమత్తతతో విధులు నిర్వహిస్తున్నాయి. అమెరికాతో సహా అంతర్జాతీయ సమాజం తైవాన్ జలసంధిలో శాంతియుత వాతావరణం ఉండాలని కోరుతున్నప్పటికీ, చైనా ప్రభుత్వం మాత్రం సరిహద్దుల్లో తన ఆధిపత్యాన్ని ప్రదర్శించేందుకు నిరంతరం విన్యాసాలు కొనసాగిస్తోంది.
