ఫ్లోరిడాలో కుప్పకూలిన ప్రైవేట్ జెట్ విమానం: తొమ్మిది మంది సజీవదహనం

సూర్య అంతర్జాతీయ బ్యూరో, వాషింగ్టన్:అమెరికాలోని సౌత్ ఫ్లోరిడాలో తీవ్ర విషాదం చోటుచేసుకుంది. తొమ్మిది మంది ప్రయాణికులతో వెళ్తున్న ఒక ప్రైవేట్ బిజినెస్ జెట్ విమానం పామ్ బీచ్ కౌంటీలోని గ్రీన్‌ఏకర్స్ నివాస ప్రాంతంలో ఆదివారం మధ్యాహ్నం కుప్పకూలింది. నేలను ఢీకొన్న మరుక్షణమే భారీ పేలుడు సంభవించి విమానం అగ్నిగోళంలా మారిపోయింది. ఈ ఘోర ప్రమాదంలో విమానంలో ప్రయాణిస్తున్న తొమ్మిది మంది అక్కడికక్కడే మరణించినట్లు అమెరికా రవాణా శాఖ కార్యదర్శి సీన్ డఫీ అధికారికంగా ధ్రువీకరించారు.

టెక్సాస్‌లోని ఆస్టిన్-బెర్గ్‌స్ట్రోమ్ అంతర్జాతీయ విమానాశ్రయం నుంచి బహామాస్‌లోని నార్త్ ఎలుథెరా విమానాశ్రయానికి వెళ్తుండగా ‘లియర్‌జెట్ 60’  రకానికి చెందిన ఈ చిన్న విమానంలో సాంకేతిక సమస్య తలెత్తింది. పైలట్ అత్యవసర పరిస్థితిని ప్రకటిస్తూ డిస్ట్రెస్ కాల్స్ పంపిన కొద్దిసేపటికే విమానం కుడివైపునకు వేగంగా ఒరిగిపోయి, నివాస సముదాయాలు మరియు రద్దీగా ఉండే రహదారికి అతి సమీపంలో నేలపై పడిపోయింది. ఈ ఘటనలో రోడ్డు పక్కన భారీ అగాథం ఏర్పడిందని, విమానం క్షిపణిలా వచ్చి పడిందని ఘటనా స్థలాన్ని పరిశీలించిన ఫ్లోరిడా గవర్నర్ రాన్ డిసాంటిస్ తెలిపారు. విమానం ఇళ్లపై నేరుగా పడకపోవడంతో నేలపై ఎవరికీ ప్రాణనష్టం జరగలేదని అధికారులు ఊపిరి పీల్చుకున్నారు.

ప్రమాద తీవ్రత కారణంగా పరిసర ప్రాంతాల్లో విద్యుత్ సరఫరా నిలిచిపోగా, నల్లటి దట్టమైన పొగలు పరిసరాలను కమ్మేశాయి. సమాచారం అందిన వెంటనే అగ్నిమాపక, రెస్క్యూ సిబ్బంది ఘటనా స్థలానికి చేరుకుని మంటలను అదుపు చేశారు. ఈ ప్రమాదంపై సమగ్ర విచారణ జరిపేందుకు నేషనల్ ట్రాన్స్‌పోర్టేషన్ సేఫ్టీ బోర్డ్  ఫెడరల్ ఏవియేషన్ అడ్మినిస్ట్రేషన్ (FAA) ప్రత్యేక దర్యాప్తు బృందాలను రంగంలోకి దించాయి.