కీవ్‌లో డ్నిప్రో నదిపై మరో వంతెనపై రష్యా దాడి
సూర్య అంతర్జాతీయ డెస్క్: ఉక్రెయిన్ రాజధాని కీవ్‌లో డ్నిప్రో నదిపై ఉన్న నార్తర్న్ బ్రిడ్జి శనివారం రష్యా వైమానిక దాడిలో దెబ్బతిందని నగర మేయర్ విటాలీ క్లిచ్కో వెల్లడించారు. రాజధానిలో మౌలిక సదుపాయాలే లక్ష్యంగా దాడులు తీవ్రమవుతున్న నేపథ్యంలో ఈ ఘటన చోటుచేసుకుంది. సహాయక బృందాలు ఘటనా స్థలానికి చేరుకున్నాయని, రహదారి ఉపరితలం, ట్రాలీబస్సుల విద్యుత్ తీగలు దెబ్బతినడంతో తూర్పు తీరం నుంచి పశ్చిమ తీరానికి వెళ్లే వాహనాల రాకపోకలను నిలిపివేశారని ఆయన తెలిపారు. ఈ దాడిలో ఎవరికీ ప్రాణనష్టం జరిగినట్లు సమాచారం లేదు.
గత రెండు రోజుల్లో సదరన్ బ్రిడ్జిపై రష్యా డ్రోన్లు పలుమార్లు దాడులు చేశాయి. దీంతో ఆ వంతెనతో పాటు డ్నిప్రో నదిపై ఉన్న మరో రెండు వంతెనలపై కూడా రాకపోకలను తాత్కాలికంగా నిలిపివేయాల్సి వచ్చింది. అక్టోబర్ 2న రష్యా మానవరహిత విమానాల దాడి తర్వాత సదరన్ బ్రిడ్జికి జరిగిన నష్టం చిత్రాలు కూడా వెలుగులోకి వచ్చాయి. వరుస దాడులతో నది మీదుగా రవాణా వ్యవస్థ తీవ్ర ఇబ్బందుల్లో పడింది.
2022లో రష్యా దండయాత్రకు ముందు కీవ్ నగర జనాభా సుమారు 30 లక్షలు కాగా, అందులో మూడో వంతుకు పైగా మంది డ్నిప్రో తూర్పు తీరమైన లెఫ్ట్ బ్యాంక్ ప్రాంతంలో నివసించేవారు. అయితే ప్రభుత్వ కార్యాలయాలు, కంపెనీలు ఎక్కువగా ఉన్న పశ్చిమ తీరమైన రైట్ బ్యాంక్‌లోనే అత్యధిక మంది ఉద్యోగాలు చేస్తున్నారు. వంతెనలు దెబ్బతింటే లక్షలాది మంది రోజువారీ ప్రయాణాలు, ఉపాధిపై నేరుగా ప్రభావం పడుతుంది.
యుద్ధంలో అత్యంత కఠినంగా గడిచిన గత శీతాకాలం జ్ఞాపకాలు నగరవాసుల మనసుల్లో ఇంకా తాజాగానే ఉన్నాయి. గత వారం రాజధానికి విద్యుత్ సరఫరా చేసే కేంద్రాలపై రష్యా దాడులు జరపడాన్ని, ఈ శీతాకాలంలో ఆశించిన భారీ బాంబు దాడుల పరంపరకు తొలి అడుగుగా ఉక్రెయిన్‌లో భావిస్తున్నారు. దీంతో రానున్న చలికాలంపై కీవ్ ప్రజల్లో ఆందోళన పెరుగుతోంది. అయితే బాంబు దాడుల్లో భాగంగా పౌరులను క్రమపద్ధతిలో లక్ష్యంగా చేసుకుంటున్నామన్న ఆరోపణలను మాస్కో గతంలో ఖండిస్తూ వచ్చింది.
