కాలిఫోర్నియా తీరంలో అరుదైన ఉష్ణమండల వింత జీవులు

సూర్య అంతర్జాతీయ డెస్క్: పసిఫిక్ మహాసముద్రంలో ఏర్పడిన అసాధారణ బలమైన ఎల్ నినో పరిస్థితులు మరియు సముద్రపు ఉష్ణోగ్రతల తీవ్ర పెరుగుదల కారణంగా కాలిఫోర్నియా తీరంలో వింత పర్యావరణ మార్పులు కనిపిస్తున్నాయి. సాధారణంగా మెక్సికో, హవాయి మరియు ఇతర ఉష్ణమండల ప్రాంతాల వెచ్చని జలాల్లో మాత్రమే జీవించే అరుదైన సముద్ర జీవులు, భారీ చేపలు ఇప్పుడు కాలిఫోర్నియా తీర ప్రాంతాలకు వలస వస్తున్నాయి. అమెరికా తీరప్రాంత జలాలు గతంలో ఎన్నడూ లేనంతగా వేడెక్కడంతో సముద్ర పర్యావరణ వ్యవస్థలో పెను మార్పులు సంభవిస్తున్నట్లు శాస్త్రవేత్తలు మరియు పర్యావరణ నిపుణులు వెల్లడించారు.

పసిఫిక్ మహాసముద్ర ఉపరితల ఉష్ణోగ్రతలు నమోదు కాని స్థాయిలో గరిష్ట స్థాయికి చేరడం వల్ల ఎల్ నినో ప్రభావం మరింత ముదిరిందని వాతావరణ పరిశోధకులు చెబుతున్నారు. ఈ ఉష్ణోగ్రతల పెరుగుదల కారణంగా దక్షిణ కాలిఫోర్నియా తీరప్రాంతాల్లోకి యెల్లోఫిన్ ట్యూనా, వాహూ, వెయిల్ షార్క్, మహి మహి వంటి ఉష్ణమండల జీవులు భారీగా ప్రవేశిస్తున్నాయి. సాధారణంగా మెక్సికన్ జలాల్లో లభించే ఈ ప్రాణులు ఆహార వేట మరియు అనుకూలమైన వెచ్చని నీటి వాతావరణం కోసం ఉత్తర దిశగా ప్రయాణించి అమెరికా తీరాలకు చేరుకుంటున్నాయి.

స్థానిక మత్స్యకారులు మరియు వినోద వేటగాళ్లకు ఈ పరిణామం అరుదైన అవకాశాన్ని కల్పిస్తోంది. సాధారణంగా సుదూర తీరాలకు వెళ్తే కానీ కనిపించని ఖరీదైన మరియు అరుదైన చేపలు ఇప్పుడు స్థానిక కాలిఫోర్నియా బోర్డర్ జలాల్లోనే లభిస్తుండటంతో ఫిషింగ్ బోట్ల రాకపోకలు పెరిగాయి. అయితే ఈ పరిస్థితులు తాత్కాలిక సంతోషాన్నిచ్చినా, స్థానిక సముద్ర జీవవైవిధ్యంపై మాత్రం తీవ్రమైన ప్రతికూల ప్రభావాన్ని చూపుతున్నాయని పర్యావరణ నిపుణులు ఆందోళన వ్యక్తం చేస్తున్నారు.

తీరప్రాంత నీరు అధికంగా వేడెక్కడం వల్ల స్థానిక శీతల జలాల జీవులకు లభించే సహజ ఆహార లభ్యత తగ్గిపోతోందని సముద్ర జీవశాస్త్రవేత్తలు స్పష్టం చేస్తున్నారు. ఇదివరకు 2014 మరియు 2015 సంవత్సరాల్లో నమోదైన మెరైన్ హిట్ వేవ్ పరిస్థితులు మళ్లీ పునరావృతమవుతున్నాయని, ఇటువంటి వాతావరణ మార్పులు సుదీర్ఘకాలం కొనసాగితే స్థానిక జాతుల ఉనికికే ప్రమాదం ఏర్పడే అవకాశం ఉందని హెచ్చరిస్తున్నారు.

వాతావరణ మార్పులు మరియు గ్లోబల్ వార్మింగ్ కాంబినేషన్ వల్ల ఎల్ నినో రూపంలో సముద్రాలు తీవ్రమైన ముప్పును ఎదుర్కొంటున్నాయని శాస్త్రవేత్తలు విశ్లేషిస్తున్నారు. రాబోయే శీతాకాలంలో కూడా పసిఫిక్ సముద్రంలో ఉష్ణోగ్రతలు అధికంగానే నమోదయ్యే అవకాశం ఉందని శాస్త్రవేత్తల ముందస్తు అంచనాలు పేర్కొంటున్నాయి. ఈ సముద్ర పర్యావరణ పరిణామాలు గ్లోబల్ క్లైమేట్ చేంజ్ యొక్క తీవ్రతకు స్పష్టమైన సంకేతాలని అంతర్జాతీయ పర్యావరణ సంస్థలు వెల్లడించాయి.