అమెరికా డీజిల్ ఎగుమతులపై నిషేధం లేదు
సూర్య అంతర్జాతీయ డెస్క్: అమెరికా డీజిల్ ఎగుమతులపై నిషేధం విధించే ప్రసక్తే లేదని అధ్యక్షుడు డొనాల్డ్ ట్రంప్ స్పష్టం చేశారు. డీజిల్ సరఫరాలను పెంచేందుకు యూరప్ దేశాలు అంగీకరించిన నేపథ్యంలో శుక్రవారం ఆయన ఈ ప్రకటన చేశారు. అదనపు సరఫరాలు అందుబాటులోకి రావడం వల్ల ఇంధన ధరలు దిగివస్తాయని ఆయన అభిప్రాయపడ్డారు. మెరైన్ వన్ హెలికాప్టర్‌లో బయలుదేరే ముందు వైట్ హౌస్ వద్ద విలేకరులతో మాట్లాడుతూ, మార్కెట్‌లోకి మరింత డీజిల్‌ను విడుదల చేయాలని తానే వ్యక్తిగతంగా యూరప్ దేశాలను కోరానని చెప్పారు.
యూరప్ వద్ద డీజిల్ నిల్వలు పుష్కలంగా ఉన్నాయని, ప్రపంచ మార్కెట్‌కు అవి కీలక తోడ్పాటు అందిస్తాయని, అమెరికా కూడా తన వంతు పాత్ర పోషిస్తుందని ట్రంప్ అన్నారు. ఎగుమతి నిషేధం జోలికి వెళ్లబోమని, చేయాల్సిన పనినే చేస్తామని తెలిపారు. ఇరాన్‌తో కొనసాగుతున్న సంఘర్షణకు ఇంధన సరఫరాల పెంపును ముడిపెట్టిన ఆయన, ఆ పరిస్థితి ముగియగానే చమురు ధరలు తగ్గుతాయని జోస్యం చెప్పారు. త్వరలోనే పెద్ద ఎత్తున చమురు అందుబాటులోకి వస్తుందని, ధరలు గతంలో ఉన్న స్థాయికి, అవసరమైతే తాను అధికారం చేపట్టిన సమయంలో ఉన్నదానికంటే కూడా తగ్గుతాయని పేర్కొన్నారు.
డీజిల్ ఎగుమతి నిషేధం అధికారికంగా పక్కకు వెళ్లినట్లేనా అని ప్రశ్నించగా, తమ ప్రభుత్వం అసలు అలాంటి చర్యకు ఎప్పుడూ సిద్ధపడలేదని ట్రంప్ బదులిచ్చారు. యూరప్ దేశాలు భారీగా డీజిల్‌ను మార్కెట్‌లోకి తెస్తుండటం గొప్ప విషయమని ప్రశంసించారు. ఇతర ప్రాంతాలతో పోలిస్తే యూరప్‌లో డీజిల్ వినియోగం ఎక్కువగా ఉండటం, నిల్వలు కూడా అధికంగా ఉండటం వల్లే ఆ దేశాలు ఈ సాయం చేయగలుగుతున్నాయని వివరించారు. యూరప్‌తో అమెరికాకు మంచి సంబంధాలున్నాయని, అదనపు సరఫరాలను విడుదల చేయాలన్న తన అభ్యర్థనకు స్పందనగానే అవి ముందుకు వచ్చాయని చెప్పారు.
మధ్యప్రాచ్య పరిణామాలు, ప్రపంచ ముడి చమురు, శుద్ధి చేసిన ఉత్పత్తుల మార్కెట్‌లో తలెత్తిన అంతరాయాలతో ఇంధన సరఫరాలు, ధరలు మరింత ముడిపడుతున్న తరుణంలో ట్రంప్ ఈ వ్యాఖ్యలు చేశారు. జీ7 దేశాలు శుక్రవారం అంతర్జాతీయ ఇంధన సంస్థ ద్వారా నాలుగు నెలల వ్యవధిలో 10 కోట్ల బ్యారెళ్ల చమురు, ఇంధన ఉత్పత్తులను సమన్వయంతో విడుదల చేసేందుకు అంగీకరించాయి. ఈ కార్యక్రమం వెంటనే ప్రారంభమవుతుందని, తొలి 20 రోజుల్లోనే భారీ మొత్తంలో డీజిల్‌ను విడుదల చేస్తామని జీ7 ప్రకటించింది.
డీజిల్ సరఫరాలపై ఒత్తిడి ఇంకా తీవ్రంగానే ఉందని అంతర్జాతీయ ఇంధన సంస్థ తెలిపింది. మధ్యప్రాచ్యం నుంచి ముడి చమురు ఎగుమతులు గణనీయంగా కోలుకున్నప్పటికీ, శుద్ధి చేసిన ఉత్పత్తుల రవాణా ఇంకా పరిమితంగానే ఉందని పేర్కొంది. మార్చిలో ప్రకటించిన 40 కోట్ల బ్యారెళ్ల సమష్టి చర్యలో ఇప్పటికే సుమారు 32.5 కోట్ల బ్యారెళ్లను విడుదల చేశామని, ఇది సరఫరా కొరతను తగ్గించడంతో పాటు ప్రపంచ మార్కెట్లకు భరోసా ఇచ్చిందని వివరించింది.
