కరువు కాలపు చీకటి నిజాలతో రణబాలి.. హీరో విజయ్ దేవరకొండ ఆసక్తికర వ్యాఖ్యలు!

సూర్య ఎంటర్‌టైన్‌మెంట్ డెస్క్: రౌడీ హీరో విజయ్ దేవరకొండ నటిస్తున్న తాజా చారిత్రక యాక్షన్ డ్రామా రణబాలి సినిమాపై ప్రేక్షకుల్లో భారీ అంచనాలు నెలకొన్నాయి. రాహుల్ సాంకృత్యాన్ దర్శకత్వంలో తెరకెక్కుతున్న ఈ చిత్రంలో విజయ్ దేవరకొండ సరసన రష్మిక మందన్నా కథానాయికగా నటిస్తున్నారు. టీ సిరీస్ సమర్పణలో మైత్రీ మూవీ మేకర్స్ పతాకంపై నిర్మాతలు నవీన్ యెర్నేని, వై. రవిశంకర్ అత్యంత ప్రతిష్టాత్మకంగా నిర్మిస్తున్న ఈ భారీ పాన్ ఇండియా చిత్రం అక్టోబరు 16న ప్రపంచవ్యాప్తంగా ఘనంగా విడుదల కానుంది. ఈ తరుణంలో సినిమాకు సంబంధించిన చారిత్రక నేపథ్యాన్ని వెల్లడిస్తూ మేకర్స్ ప్రమోషన్ కార్యక్రమాలను జోరుగా నిర్వహిస్తున్నారు.

సుమారు 150 ఏళ్ల క్రితం భారతదేశంలో చోటుచేసుకున్న భయంకరమైన కరువు కాలపు పరిస్థితుల నేపథ్యంలో ఈ సినిమాను రూపొందించినట్లు హీరో విజయ్ దేవరకొండ తెలిపారు. ఆ సమయంలో భారతీయులు ఆకలితో అల్లాడిపోతుంటే, బ్రిటీష్ పాలకు మాత్రం లక్షలాది టన్నుల ధాన్యాన్ని ఇతర ప్రాంతాలకు, వారు యుద్ధాలు చేస్తున్న ప్రదేశాలకు తరలించేవారని ఆయన ఆవేదన వ్యక్తం చేశారు. ఆకలితో అలమటిస్తున్నప్పటికీ ప్రజలు పడిన వేదనను గుర్తుంచుకుంటూ అమరులైన వారికి నివాళిగా ఈ మంచి కథను తెరకెక్కించినట్లు ఆయన స్పష్టం చేశారు. చరిత్రలో ఎవరికీ తెలియని ఆ చీకటి కోణాలను ప్రేక్షకులకు చేరవేయాలనే ఉద్దేశంతో ఈ ప్రాజెక్ట్‌ను రూపొందించామని ఆయన వెల్లడించారు.

ఈ చారిత్రక కథాంశం వెనుక ఉన్న వాస్తవాలను వెలికితీసేందుకు చిత్ర యూనిట్ రణబాలి నెవర్ ఫర్ గెట్ ది ట్రూత్ పేరుతో నాలుగు ఎపిసోడ్ల డాక్యుమెంటరీ సిరీస్‌ను తీసుకువచ్చింది. ఇందులో భాగంగా మొదటి ఎపిసోడ్ అయిన ది ఫెమైన్‌ వి ఫర్‌ గాట్ సోమవారం అధికారికంగా స్ట్రీమింగ్‌కు వచ్చి ప్రేక్షకులను ఆకట్టుకుంటోంది. ఈ సందర్భంగా దర్శకుడు రాహుల్ సాంకృత్యాన్ మాట్లాడుతూ 1876 నుంచి 1878 మధ్య కాలంలో ఏర్పడిన కరువు కారణంగా కోటి మంది భారతీయులు ప్రాణాలు కోల్పోయారని పేర్కొన్నారు. నాటి కాలంలో ప్రజలు పడిన బాధను, వారు చేసిన త్యాగాలను అర్థం చేసుకునేందుకు తాము ఎంతో శ్రమించామని నటి రష్మిక మందన్నా తెలిపారు.

భారతీయ చలనచిత్ర పరిశ్రమలో సరికొత్త చరిత్రను సృష్టించేందుకు సిద్ధమవుతున్న ఈ పీరియాడిక్ యాక్షన్ డ్రామాకు సంబంధించిన ప్రతి అప్‌డేట్ సోషల్ మీడియాలో ట్రెండింగ్‌గా మారుతోంది. అత్యున్నత సాంకేతిక విలువలతో, భావోద్వేగభరితమైన కథాంశంతో రూపుదిద్దుకుంటున్న ఈ చిత్రం బాక్సాఫీస్ వద్ద సరికొత్త రికార్డులను బద్దలు కొట్టడం ఖాయమని సినీ విశ్లేషకులు భావిస్తున్నారు. సినిమా విడుదల తేదీ దగ్గరపడుతున్న కొద్దీ చిత్రబృందం విడుదల చేస్తున్న ప్రచార చిత్రాలు, డాక్యుమెంటరీ విశేషాలు సినిమాపై అంచనాలను తారాస్థాయికి చేర్చుతున్నాయి. త్వరలోనే ఈ చిత్రానికి సంబంధించిన మరిన్ని అధికారిక వివరాలు ప్రేక్షకుల ముందుకు రానున్నాయి.