బాక్సాఫీస్ వద్ద రజినీకాంత్ సరికొత్త రికార్డు.. తొలి సోమవారం రూ. 42 కోట్లతో సంచలనం!

సూర్య ఎంటర్‌టైన్‌మెంట్ డెస్క్: సూపర్‌స్టార్ రజినీకాంత్ హీరోగా, డైరెక్టర్ నెల్సన్ దిలీప్‌కుమార్ తెరకెక్కించిన యాక్షన్ ఎంటర్‌టైనర్ 'జైలర్ 2' బాక్సాఫీస్ వద్ద అసాధారణ వసూళ్లతో చరిత్ర సృష్టిస్తోంది. భారీ అంచనాల మధ్య విడుదలైన ఈ చిత్రం మొదటి వీకెండ్‌ను విజయవంతంగా పూర్తి చేసుకుని, మొదటి సోమవారం నాడు కూడా అద్భుతమైన కలెక్షన్లను సాధించి ట్రేడ్ పండితులను సైతం ఆశ్చర్యపరిచింది. వర్కింగ్ డే అయినప్పటికీ బాక్సాఫీస్ వద్ద ఏమాత్రం జోరు తగ్గించని ఈ సినిమా కోలీవుడ్ చరిత్రలో ఎన్నడూ లేనివిధంగా సరికొత్త రికార్డును తన ఖాతాలో వేసుకుంది.

విడుదలైన ఐదో రోజు అనగా మొదటి సోమవారం నాడు దేశవ్యాప్తంగా అన్ని భాషల్లో కలిపి 'జైలర్ 2' చిత్రం అరుదైన రీతిలో రూ. 42.35 కోట్ల నెట్ కలెక్షన్లను రాబట్టింది. తద్వారా తమిళ సినిమా చరిత్రలోనే ఇప్పటివరకు ఎవ్వరూ సాధించని విధంగా అత్యధిక మొదటి సోమవారం (ఫస్ట్ మండే) వసూళ్లను సాధించిన చిత్రంగా ఈ సినిమా అగ్రస్థానంలో నిలిచింది. కేవలం తమిళ వెర్షన్ నుంచే దాదాపు రూ. 31 కోట్లకు పైగా నెట్ వసూళ్లు రావడం విశేషం. ఈ అద్భుతమైన కలెక్షన్లతో కేవలం ఐదు రోజుల్లోనే ఈ చిత్రం దేశీయంగా రూ. 242 కోట్లకు పైగా నెట్ కలెక్షన్లను సాధించగా, ప్రపంచవ్యాప్తంగా రూ. 477 కోట్లకు పైగా గ్రాస్ వసూళ్లను రాబట్టి రూ. 500 కోట్ల మైలురాయికి అతి చేరువలో దూసుకెళ్తోంది.

తలైవా మాస్ అండ్ స్టైలిష్ యాక్షన్ ప్రదర్శన, అనిరుద్ రవిచందర్ అందించిన దద్దరిల్లే బ్యాక్‌గ్రౌండ్ మ్యూజిక్ ప్రేక్షకులను థియేటర్లకు క్యూ కట్టేలా చేస్తున్నాయి. పండుగ సెలవుల జోరు ముగిసినప్పటికీ, మంగళవారం కూడా ఇదే తరహాలో ఆక్యుపెన్సీ నమోదు కావడంతో బాక్సాఫీస్ వద్ద రజినీకాంత్ స్టామినా ఏపాటిదో మరోసారి నిరూపితమైంది. రాబోయే రోజుల్లో ఈ చిత్రం మరిన్ని సంచలన రికార్డులను బద్దలు కొట్టడం ఖాయమని ట్రేడ్ వర్గాలు ధీమా వ్యక్తం చేస్తున్నాయి.

Also Read: బాక్సాఫీస్ వద్ద రజినీకాంత్ సునామీ.. 2026లో మూడో అత్యధిక వసూళ్లు సాధించిన చిత్రంగా 'జైలర్ 2'!