ప్రభాస్ భారీ సినిమా తప్పుకోవడంతో.. ఆ పెద్ద డేట్‌ను లాక్ చేసిన 'ఎల్లమ్మ' మూవీ
సూర్య ఎంటర్‌టైన్‌మెంట్ డెస్క్: టాలీవుడ్‌లో బాక్సాఫీస్ వద్ద సినిమాల విడుదల తేదీల మార్పులు చిత్ర పరిశ్రమలో ఎప్పుడూ ఆసక్తికరంగానే ఉంటాయి. పాన్ ఇండియా స్టార్ ప్రభాస్ హీరోగా, టాలెంటెడ్ డైరెక్టర్ సందీప్ రెడ్డి వంగా దర్శకత్వంలో తెరకెక్కుతున్న మోస్ట్ అవేటెడ్ ప్రాజెక్ట్ స్పిరిట్ సినిమా విడుదల తేదీపై కొద్దిరోజులుగా జరుగుతున్న చర్చలకు తెరపడింది. ఈ చిత్రానికి సంబంధించి ముందుగా మార్చి 5వ తేదీని లాక్ చేసినప్పటికీ, షూటింగ్ పనులు ఇంకా పూర్తికాకపోవడంతో ఈ భారీ ప్రాజెక్ట్‌ను వేసవి నుంచి దీపావళికి వాయిదా వేయాలని మేకర్స్ నిర్ణయించుకున్నట్లు తెలుస్తోంది. దీనితో బాక్సాఫీస్ వద్ద అత్యంత కీలమైన మార్చి తొలి వారపు స్లాట్ ఒక్కసారిగా ఖాళీ కావడంతో టాలీవుడ్ వర్గాల్లో కొత్త చర్చ మొదలైంది.
ప్రభాస్ సినిమా తప్పుకున్న ఆ ఖాళీ తేదీని ప్రముఖ నిర్మాత దిల్ రాజు అత్యంత వ్యూహాత్మకంగా తమ కొత్త సినిమా కోసం వినియోగించుకున్నారు. బలగం సినిమాతో సంచలన విజయం సాధించి జాతీయ స్థాయిలో గుర్తింపు తెచ్చుకున్న దర్శకుడు వేణు యెల్దండి తెరకెక్కిస్తున్న తాజా రూటెడ్ రస్టిక్ డ్రామా ఎల్లమ్మ సినిమాపై ఇప్పటికే భారీ అంచనాలు నెలకొన్నాయి. అంతేకాకుండా టాలీవుడ్ ప్రముఖ సంగీత దర్శకుడు దేవిశ్రీ ప్రసాద్ ఈ చిత్రంతో హీరోగా పరిచయం కానుండటం విశేషం. తాజాగా మేకర్స్ అధికారికంగా విడుదల చేసిన పోస్టర్ ద్వారా ఈ సినిమా విడుదల తేదీని మార్చి 5వ తేదీగా ఖరారు చేశారు.
ప్రభాస్ లాంటి స్టార్ హీరో సినిమా తప్పుకున్నప్పటికీ, అదే తేదీకి విభిన్నమైన కథాంశంతో వస్తున్న ఎల్లమ్మ సినిమా ప్రేక్షకులకు మరో సాలిడ్ థియేట్రికల్ అనుభూతిని పంచడానికి సిద్ధమవుతోంది. గ్రామీణ వాతావరణం, పల్లెటూరి నూతన భావోద్వేగాలతో తెరకెక్కుతున్న ఈ చిత్రానికి దేవిశ్రీ ప్రసాద్ స్వయంగా సంగీతం అందిస్తుండటంతో అంచనాలు తారాస్థాయికి చేరాయి. ఈ చిత్రాన్ని పాన్ ఇండియా స్థాయిలో అత్యున్నత ప్రమానాలతో విడుదల చేసేందుకు సన్నాహాలు చేస్తున్నారు. బాక్సాఫీస్ వద్ద దిల్ రాజు నిర్మాణంలో వస్తున్న ఈ క్రేజీ ప్రాజెక్ట్ ఎలాంటి సంచలనాలు సృష్టిస్తుందనేది ఇప్పుడు సినీ వర్గాల్లో తీవ్ర ఆసక్తిని రేకెత్తిస్తోంది.
Also Read: ఉదయాన్నే పచ్చగడ్డిపై చెప్పులు లేకుండా నడిస్తే ఎన్ని ఆరోగ్య లాభాలా.. నిపుణులు ఏమంటున్నారంటే
