ఇట్లు అర్జున మ్యూజికల్ కాన్సర్ట్‌లో రామ్ చరణ్, నాగార్జున ఆసక్తికర వ్యాఖ్యలు
సూర్య ఎంటర్‌టైన్‌మెంట్ డెస్క్: టాలీవుడ్‌లో వైవిధ్యమైన చిత్రాలతో ప్రేక్షకులను అలరిస్తున్న అక్కినేని నాగార్జున తాజాగా మరో కొత్త సినిమాతో ప్రేక్షకుల ముందుకు వచ్చేందుకు సిద్ధమవుతున్నారు. అనీష్ హీరోగా, అనస్వర రాజన్ హీరోయిన్‌గా నటిస్తున్న 'ఇట్లు అర్జున' చిత్రానికి మహేష్ ఉప్పల దర్శకత్వం వహిస్తుండగా, ప్రముఖ దర్శకుడు వెంకీ కుడుముల ఈ చిత్రాన్ని నిర్మిస్తున్నారు. నవంబర్ 13న ఈ సినిమా అత్యంత భారీ స్థాయిలో విడుదల కానున్న నేపథ్యంలో చిత్ర యూనిట్ ఘనంగా మ్యూజికల్ కాన్సర్ట్ నిర్వహించింది.
ఈ వేడుకకు మెగా పవర్ స్టార్ రామ్ చరణ్‌తో పాటు అఖిల్ అక్కినేని ప్రత్యేక అతిథులుగా హాజరై సందడి చేశారు. ఈ వేదికపై అక్కినేని నాగార్జున మాట్లాడుతూ సినిమాపై తనకున్న నమ్మకాన్ని, ప్రశంసలను పంచుకున్నారు. రంగస్థలం చిత్రంలో రామ్ చరణ్ చెవిటి పాత్ర పోషించడానికి పదేళ్ల అనుభవం పట్టిందని, కానీ డెబ్యూ హీరో అయిన అనీష్ మాత్రం తొలి సినిమాకే మూగవాడిగా నటించడం సాహసమని పేర్కొన్నారు. కేవలం కళ్లు, హావభావాలతోనే డైలాగ్స్ లేకుండా నటించడం అంత సులభం కాదని, సినిమా చూశాక తాను ఎంతగానో ఆశ్చర్యపోయానని నాగార్జున వెల్లడించారు. అనీష్ తన పెర్ఫార్మెన్స్‌తో ప్రేక్షకులను కచ్చితంగా మెప్పిస్తాడని, స్క్రీన్ మీద హీరోహీరోయిన్ల కెమిస్ట్రీ చాలా అద్భుతంగా వచ్చిందని ప్రశంసించారు.
ఈ కార్యక్రమంలో సంగీత దర్శకుడు ఎస్. థమన్ అందించిన పాటలపై కూడా నాగార్జున సరదాగా వ్యాఖ్యలు చేశారు. తన సినిమాలకు సైతం థమన్ ఇలాంటి అద్భుతమైన ఆడియో ఆల్బమ్ ఇవ్వలేదని, ఈ చిత్రంలోని ప్రతి పాట శ్రోతలను విపరీతంగా ఆకట్టుకుంటుందని తెలిపారు. ఇక ఇదే వేదికపై మెగా పవర్ స్టార్ రామ్ చరణ్ మాట్లాడుతూ టాలీవుడ్‌లో కొత్త ప్రతిభను ప్రోత్సహించడంలో నాగార్జున ప్రత్యేక శ్రద్ధ చూపుతారని, ఆయన సపోర్ట్ ఉంటే తప్పు జరిగే ప్రసక్తే ఉండదని కొనియాడారు. నవంబర్ 13న విడుదలవుతున్న ఈ చిత్రం అందరి అంచనాలను తలకిందులు చేస్తూ బాక్సాఫీస్ వద్ద ఘన విజయం సాధించాలని చిత్ర బృందం ఆకాంక్షించింది.
Also Read: భారీగా పెరిగిన బంగారం, వెండి ధరలు: ప్రధాన నగరాల్లో తాజా రేట్ల వివరాలు ఇవే!
