నెట్‌ఫ్లిక్స్‌ను మెప్పించిన రొమాంటిక్ డ్రామా.. అక్టోబర్ 23న థియేటర్లలోకి 'హైకూ'!
సూర్య ఎంటర్‌టైన్‌మెంట్ డెస్క్: ఏగన్, శ్రీదేవి, ఫెమినా జార్జ్ ప్రధాన పాత్రల్లో తెరకెక్కిన సరికొత్త రొమాంటిక్ ఎంటర్‌టైనర్ చిత్రం 'హైకూ' ప్రేక్షకుల ముందుకు రావడానికి సిద్ధమైంది. విజన్ సినిమా హౌస్ బ్యానర్‌పై యువరాజ్ చిన్నసామి దర్శకత్వంలో డాక్టర్ డి. అరుళానందు మరియు మాథ్యూ అరుళానందు ఈ చిత్రాన్ని నిర్మించారు. యూత్‌ఫుల్ కాలేజ్ లవ్ స్టోరీగా రూపొందిన ఈ చిత్రం అక్టోబర్ 23న ప్రపంచవ్యాప్తంగా థియేటర్లలో విడుదల కానుంది. ఈ నేపథ్యంలో హైదరాబాద్‌లో నిర్వహించిన మూవీ ప్రెస్ మీట్‌లో చిత్ర యూనిట్‌తో పాటు ప్రముఖ రచయిత, నిర్మాత కోన వెంకట్ పాల్గొని సంతోషాన్ని పంచుకున్నారు.
ఈ సందర్భంగా మాట్లాడిన కోన వెంకట్, సాధారణంగా సినిమాలు పూర్తియ్యాక ఓటీటీ డీల్స్ కుదురుతాయని, కానీ ఈ సినిమా కథ విని షూటింగ్ ప్రారంభానికి ముందే ప్రముఖ ఓటీటీ ప్లాట్‌ఫామ్ నెట్‌ఫ్లిక్స్ హక్కులను సొంతం చేసుకోవడం చాలా గొప్ప విషయమని కొనియాడారు. ఈ కథ డిజిటల్ దిగ్గజ సంస్థను ఎంతగానో మెప్పించిందని, కాలేజీ రోజులను మళ్లీ గుర్తుచేసేలా ఒక సిన్సియర్ లవ్ స్టోరీగా ఈ చిత్రం రూపుదిద్దుకుందని చెప్పారు. ప్రేమికులను, యువతను ఈ చిత్రం తప్పకుండా అలరిస్తుందని, ముఖ్యంగా హీరోయిన్ శ్రీదేవి నటన ఈ సినిమాకు ప్రత్యేక ఆకర్షణగా నిలుస్తుందని ఆయన ఆశాభావం వ్యక్తం చేశారు.
ఇక కథానాయకుడు ఏగన్ మాట్లాడుతూ, తన ప్రాణప్రదమైన ఈ సినిమాపై ఎంతో నమ్మకంతో ఉన్నానని, మ్యూజిక్ డైరెక్టర్ సిద్దు కుమార్ అద్భుతమైన స్వరాలను అందించారని తెలిపారు. నటి శ్రీదేవి మాట్లాడుతూ, ప్రతి ఒక్కరి హృదయానికి కనెక్ట్ అయ్యే ప్రేమానుబంధాలు మరియు రిలేషన్‌షిప్‌లోని కాంప్లికేషన్స్‌ను ఈ సినిమాలో చర్చిస్తున్నట్లు వెల్లడించారు. అక్టోబర్ 23న విడుదలవుతున్న ఈ బ్యూటిఫుల్ లవ్ స్టోరీ ప్రేక్షకులకు సరికొత్త అనుభూతిని ఇస్తుందని చిత్ర బృందం ధీమా వ్యక్తం చేసింది. ప్రస్తుతం సోషల్ మీడియాలో ఈ సినిమా ప్రమోషనల్ కంటెంట్ నెటిజన్లను విశేషంగా ఆకట్టుకుంటోంది.
Also Read: నాగార్జున మైలురాయి చిత్రంలో టబు పవర్‌ఫుల్ లుక్.. దసరా కానుకగా అదిరిపోయే సర్‌ప్రైజ్!
