అమ్మవారికి ప్రత్యేక పూజలు చేసి బతుకమ్మ ఆడిన మాజీ చైర్‌పర్సన్

సూర్య జగిత్యాల ప్రతినిధి జగిత్యాల పట్టణంలోని శ్రీ భక్త మార్కండేయ దేవాలయంలో నిర్వహిస్తున్న శ్రీ గాయత్రీ దుర్గాదేవి అమ్మవారి నవరాత్రి ఉత్సవాల్లో భాగంగా జగిత్యాల మాజీ మున్సిపల్ చైర్‌పర్సన్ అడువాల జ్యోతి లక్ష్మణ్ అమ్మవారిని దర్శించుకుని ప్రత్యేక పూజలు నిర్వహించారు. ఈ సందర్భంగా శ్రీ గాయత్రీ దుర్గాదేవి అమ్మవారికి భక్తిశ్రద్ధలతో ఓడిబియ్యం సమర్పించి మొక్కులు చెల్లించుకున్నారు.అనంతరం జగిత్యాల పట్టణంలోని నవదుర్గ క్షేత్ర పీఠంలో నిర్వహిస్తున్న దుర్గాదేవి నవరాత్రి ఉత్సవాల్లో పాల్గొని అమ్మవారిని దర్శించుకున్నారు. బతుకమ్మ వేడుకల్లో భాగంగా మహిళలతో కలిసి అమ్మవారి సన్నిధిలో బతుకమ్మ ఆడుతూ సందడి చేశారు. ఈ సందర్భంగా జగిత్యాల పట్టణ ప్రజలందరూ సుఖసంతోషాలతో, ఆయురారోగ్యాలతో ఉండాలని, అమ్మవారి ఆశీస్సులు అందరిపై ఉండాలని ప్రార్థించారు. నవరాత్రి ఉత్సవాలు, బతుకమ్మ వేడుకలతో ఆలయాల వద్ద ఆధ్యాత్మిక వాతావరణం నెలకొనగా, మహిళలు భక్తిశ్రద్ధలతో పూజా కార్యక్రమాల్లో పాల్గొన్నారు.