'జైలర్ 2'లో ఛాన్స్ రావడంపై నటి పూర్ణ ఎమోషనల్.. రజనీకాంత్‌తో స్క్రీన్ షేర్ చేయడంపై రియాక్షన్!
సూర్య ఎంటర్‌టైన్‌మెంట్ డెస్క్: సూపర్‌స్టార్ రజనీకాంత్ కథానాయకుడిగా నెల్సన్ దిలీప్‌కుమార్ దర్శకత్వంలో తెరకెక్కిన సంచలన చిత్రం 'జైలర్ 2' బాక్సాఫీస్ వద్ద విజయం సాధిస్తూ కలెక్షన్ల వర్షం కురిపిస్తోంది. ప్రపంచవ్యాప్తంగా మూడు రోజుల్లోనే రూ.300 కోట్లకు పైగా గ్రాస్ వసూళ్లను రాబట్టి ఈ సినిమా కొత్త రికార్డులను నమోదు చేస్తోంది. ఈ క్రేజీ ప్రాజెక్ట్‌లో భాగమైన నటి పూర్ణ చేసిన డ్యాన్స్ నంబర్‌కు ప్రేక్షకుల నుంచి అద్భుతమైన స్పందన లభిస్తోంది. ఈ నేపథ్యంలో చిత్రంలో తనకు అవకాశం కల్పించినందుకు గాను డైరెక్టర్ నెల్సన్‌తో పాటు చిత్ర బృందానికి నటి పూర్ణ సోషల్ మీడియా వేదికగా ప్రత్యేకంగా కృతజ్ఞతలు తెలుపుతూ ఎమోషనల్ పోస్ట్ చేశారు.
ఈ సందర్భంగా నటి పూర్ణ స్పందిస్తూ, భారతీయ చిత్రసీమలో సూపర్‌స్టార్ రజనీకాంత్‌తో కలిసి నటించాలని ప్రతి ఒక్క నటీనటులు కోరుకుంటారని, కానీ తనకు అలాంటి గొప్ప అవకాశం వస్తుందని కలలో కూడా ఊహించలేదని తెలిపారు. తాను రజనీకాంత్‌కు పెద్ద వీరాభిమానని, ఆయన నటించిన 'నరసింహ' సినిమా తనకు ఎంతో ఇష్టమైన చిత్రమని పేర్కొన్నారు. 'జైలర్ 2' వంటి భారీ చిత్రంలో ఒక పాటలో మెరిసే అవకాశం రావడం తన అదృష్టమని చెబుతూ, ఈ ప్రాజెక్ట్‌లో భాగం చేసినందుకు దర్శకుడు నెల్సన్ దిలీప్‌కుమార్‌కు ఆమె హృదయపూర్వక ధన్యవాదాలు తెలిపారు.
అంతేకాకుండా థియేటర్లలో తన పెర్ఫార్మెన్స్‌కు ప్రేక్షకుల నుంచి వస్తున్న విశేష స్పందన చూసి ఎంతో ఆనందం వేసిందని పూర్ణ వ్యాఖ్యానించారు. మనం పడే కష్టం, పని పట్ల ఉండే అంకితభావానికి ఎప్పటికైనా తగిన ఫలితం లభిస్తుందని, ఇప్పుడు తనకు 'జైలర్ 2' రూపంలో సరిగ్గా అలాంటి ఫలితమే దక్కిందని ఆమె భావోద్వేగానికి గురయ్యారు. సోషల్ మీడియాలో వైరల్ అవుతున్న పూర్ణ ఎమోషనల్ పోస్ట్‌పై ఆమె అభిమానులు మరియు సినీ ప్రముఖులు అభినందనలు తెలుపుతున్నారు.
Also Read: బ్రాహ్మణ పట్టు వైసిపి ఎంపీటీసీ అభ్యర్థిగా యోగానంద రెడ్డి
