పండక్కి ప్రతి ఒక్కరూ నవ్వుకుంటూ చూసే క్రేజీ ఫ్యామిలీ ఎంటర్‌టైనర్ 'క్రేజీ కల్యాణం': హీరోయిన్ అనుపమ పరమేశ్వరన్
సూర్య ఎంటర్‌టైన్‌మెంట్ డెస్క్: దసరా పండుగ కానుకగా ప్రేక్షకుల ముందుకు రాబోతున్న పూర్తి స్థాయి కుటుంబ కథా చిత్రం 'క్రేజీ కల్యాణం'. నవరసరాయ డాక్టర్ నరేష్ విజయ కృష్ణ, అనుపమ పరమేశ్వరన్, తరుణ్ భాస్కర్, రాజ్ వెడ్స్ రాంబాయి ఫేమ్ అఖిల్ ఉడ్డెమారి ప్రధాన పాత్రల్లో నటిస్తున్న ఈ చిత్రాన్ని యారో సినిమాస్ బ్యానర్‌పై ప్రొడక్షన్ నెం. 2గా ప్యాషనేట్ ప్రొడ్యూసర్ బూసం జగన్ మోహన్ రెడ్డి నిర్మిస్తున్నారు. దర్శకుడు బద్రప్ప గాజుల అత్యంత వినోదాత్మకంగా తెరకెక్కిస్తున్న ఈ సినిమా అక్టోబర్ 16న ప్రపంచవ్యాప్తంగా గ్రాండ్‌గా థియేటర్లలో విడుదలకు సిద్ధమవుతోంది. ఈ నేపథ్యంలో చిత్ర విశేషాలను, తన పాత్ర ప్రాధాన్యతను హీరోయిన్ అనుపమ పరమేశ్వరన్ ప్రత్యేక ఇంటర్వ్యూలో పంచుకున్నారు.
ఈ సినిమాకు మొదట వేరే టైటిల్ అనుకున్నప్పటికీ, షూటింగ్ సమయంలో ప్రతి సన్నివేశం ఎంతో క్రేజీగా అనిపించడంతో దర్శకుడు 'క్రేజీ కల్యాణం'గా పేరు మార్చారని అనుపమ తెలిపారు. నరేష్, తరుణ్ భాస్కర్, అఖిల్ వంటి టాలెంటెడ్ నటులు కాస్టింగ్‌లో భాగం కావడంతో ఈ ప్రాజెక్ట్ మరింత ప్రత్యేకం అయిందని చెప్పారు. నిర్మాత జగన్ మోహన్ రెడ్డి అందించిన సహకారంతోనే ఈ చిత్రం అనుకున్న విధంగా తెరకెక్కిందని, పండుగ పూట ప్రతి ఒక్కరూ కుటుంబంతో కలిసి థియేటర్లలో నవ్వుకుంటూ ఎంజాయ్ చేసేలా ఈ సినిమా ఉంటుందని ఆమె ధీమా వ్యక్తం చేశారు.
ఈ చిత్రంలో తన పాత్ర గురించి మాట్లాడుతూ, పెళ్లి అనేది ఇద్దరు వ్యక్తులు సంతోషంగా జీవించడానికి చేసుకునే బంధం కానీ, అమ్మాయిని ఇంట్లో పనిమనిషిగా మార్చేందుకు కాదనే బలమైన ఆలోచన ఉన్న కీర్తి పాత్రలో తాను కనిపిస్తానని అనుపమ వెల్లడించారు. ట్రైలర్‌లో చూపించినట్లుగా భార్యాభర్తల మధ్య జరిగే చిన్నచిన్న సరదా సంఘటనలు, రిలేషన్షిప్ స్ట్రగుల్స్ ప్రేక్షకులకు ఎంతో రియలిస్టిక్‌గా అనిపిస్తాయని తెలిపారు. దర్శకుడు బద్రప్ప చెప్పిన స్క్రిప్ట్ నచ్చి తాను వెంటనే ఈ ప్రాజెక్ట్‌ను అంగీకరించానని, తెలంగాణ యాసలో సాగే ఈ కథలో కామెడీ ఎంతో సహజంగా పండిందని పేర్కొన్నారు.
నటుడిగా అఖిల్ ఎమోషనల్ హానెస్టీతో అద్భుతమైన పెర్ఫార్మెన్స్ ఇచ్చారని, అలాగే డాక్టర్ నరేష్ లాంటి సీనియర్ నటులతో కలిసి పనిచేయడం తనకు ఎంతో ఇన్‌స్పైరింగ్‌గా అనిపించిందని అనుపమ తెలిపారు. తరుణ్ భాస్కర్ పోషించిన బాలరాజు పాత్ర మన ఇంట్లో మనిషిలా ఉంటూ విపరీతమైన వినోదాన్ని పంచుతుందని చెప్పారు. తన తల్లిదండ్రులు కూడా ఈ సినిమా చూసి ఎంతో అభినందించారని, భాషతో సంబంధం లేకుండా ప్రతి ఒక్కరూ ఈ చిత్రంలోని ఎమోషన్స్‌కు కనెక్ట్ అవుతారని తెలిపారు. నటిగా ఎప్పుడూ వైవిధ్యమైన పాత్రలనే ఎంచుకోవాలని కోరుకుంటానని, క్రేజీ కల్యాణంలోని కీర్తి పాత్ర ప్రేక్షకులకు చిరకాలం గుర్తుండిపోతుందని ఆమె ఆశాభావం వ్యక్తం చేశారు.
Also Read: 'డ్యూ డేట్' చిత్రంలో పవర్‌ఫుల్ లాయర్‌గా విలక్షణ నటుడు సునీల్.. హైదరాబాద్‌లో జోరుగా షూటింగ్
