అమెరికాలో నిరుద్యోగ భృతి దరఖాస్తుల్లో స్వల్ప పెరుగుదల

సూర్య బిజినెస్ డెస్క్: అమెరికాలో నిరుద్యోగ భృతి కోసం దరఖాస్తు చేసుకునే పౌరుల సంఖ్య గత వారంలో స్వల్పంగా పెరిగింది. యుఎస్ లేబర్ డిపార్ట్‌మెంట్ గురువారం విడుదల చేసిన నివేదిక ప్రకారం, అక్టోబర్ 10తో ముగిసిన వారానికి కొత్తగా నిరుద్యోగ భృతి కోసం దాఖలైన దరఖాస్తుల సంఖ్య వెయ్యి పెరిగి 1,99,000కు చేరింది. అయితే కంపెనీలు ఉద్యోగులను తొలగించే ప్రక్రియ (లేఆఫ్‌లు) అత్యల్ప స్థాయిలోనే కొనసాగుతుండటంతో నిరుద్యోగ భృతి దరఖాస్తుల్లో పెద్దగా మార్పులు నమోదు కాలేదని, దీనివల్ల అమెరికా లేబర్ మార్కెట్ స్థిరంగానే ఉందని ఆర్థిక విశ్లేషకులు అభిప్రాయపడుతున్నారు.

మరోవైపు అక్టోబర్ 3తో ముగిసిన వారానికి సంబంధించి నిరంతరం నిరుద్యోగ భృతి పొందుతున్న వారి సంఖ్య 4,000 తగ్గి 17.1 లక్షలకు చేరింది. వ్యాపార సంస్థలు నూతన నియామకాలను నెమ్మదిగా చేపడుతున్నప్పటికీ, ప్రస్తుత సిబ్బందిని తొలగించకుండా అట్టేపెట్టుకునేందుకే ప్రాధాన్యత ఇస్తున్నాయి. దిగుమతి సుంకాల పెంపు, మధ్యప్రాచ్యంలో ఇరాన్ యుద్ద పరిణామాలు మరియు ముడిసరుకుల వ్యయం పెరగడం వల్ల కంపెనీలు కొత్త ఉద్యోగాల కల్పనలో కొంత వేచి చూసే ధోరణిని అవలంబిస్తున్నాయని నివేదిక పేర్కొంది. అదే సమయంలో ఆర్టిఫిషియల్ ఇంటెలిజెన్స్ రంగంలో పెట్టుబడులు పెరగడం వల్ల కూడా కొన్ని సంస్థలు నియామకాల వేగాన్ని తగ్గించాయి.

ప్రస్తుతం అమెరికాలో నిరుద్యోగ రేటు 4.2 శాతంగా కొనసాగుతోంది. పరిశ్రమలలో సాంకేతిక, నైపుణ్యం కలిగిన నిపుణుల కొరత ఇంకా వేధిస్తున్నప్పటికీ, ఉన్న ఉద్యోగులను నిలబెట్టుకోవడానికే యాజమాన్యాలు మొగ్గు చూపుతున్నాయి. ఫెడరల్ రిజర్వ్ రాబోయే రోజుల్లో తీసుకోబోయే వడ్డీ రేట్ల నిర్ణయాలకు ఈ లేబర్ మార్కెట్ గణాంకాలు అత్యంత కీలకమైన ఆధారంగా నిలవనున్నాయి. ద్రవ్యోల్బణ ఒత్తిళ్లు ఉన్నప్పటికీ లేబర్ మార్కెట్ తీవ్ర స్థాయిలో దెబ్బతినకపోవడం అమెరికా ఆర్థిక వ్యవస్థకు ఊరటనిచ్చే అంశమని నిపుణులు భావిస్తున్నారు.