'గరివిడి లక్ష్మి' బయోపిక్‌లో ఆనంది.. ఉత్తరాంధ్ర బుర్రకథ కళాకారిణిగా నటిస్తూ కీలక వ్యాఖ్యలు!

సూర్య ఎంటర్‌టైన్‌మెంట్ డెస్క్: ఉత్తరాంధ్ర జానపద కళలకు మరియు బుర్రకథ రంగానికి విశేష ప్రజాదరణ తెచ్చిపెట్టిన అరుదైన కళాకారిణి గరివిడి లక్ష్మి. ఆమె జీవితకథ ఆధారంగా రూపుదిద్దుకున్న బయోపిక్ చిత్రంలో నటి ఆనంది టైటిల్ రోల్‌లో నటించారు. 'ఈ రోజుల్లో', 'బస్టాప్' చిత్రాలతో పరిచయమై, తమిళ సినీ రంగానికి వెళ్లి అక్కడ కథానాయికగా మంచి పేరు తెచ్చుకున్న ఆనంది, చాలా కాలం తర్వాత ఒక పవర్‌ఫుల్ బయోపిక్‌లో కనిపించనున్నారు. ఈ సందర్భంగా ఆమె తన సినీ ప్రయాణం మరియు 'గరివిడి లక్ష్మి' పాత్ర కోసం పడిన శ్రమను మీడియా ముందు పంచుకున్నారు.తాను పుట్టి పెరిగింది వరంగల్ అని, పక్కా తెలంగాణ అమ్మాయిని అయినప్పటికీ, తమిళంలో మొదటి సినిమా చేసినప్పుడే అందరూ తనను తమిళమ్మాయి అని భావించారని ఆనంది తెలిపారు.

'గరివిడి లక్ష్మి' స్క్రిప్ట్ తన వద్దకు వచ్చే వరకు ఆమె గురించి లేదా బుర్రకథ గురించి తనకు పెద్దగా తెలియదని, అయితే కథ విన్నాక ఆమె గొప్పతనం ప్రపంచానికి తెలియాలనే ఉద్దేశంతో వెంటనే ప్రాజెక్ట్‌కు అంగీకరించానని చెప్పారు. తెలుగులో బయోపిక్ చిత్రాలు రావడం చాలా అరుదని, అలా వచ్చిన అవకాశాన్ని తాను ఎట్టిపరిస్థితుల్లోనూ వదులుకోకూడదని భావించినట్లు వెల్లడించారు.   సాధారణంగా తాను ఏ సన్నివేశానికైనా రెండు టేక్స్‌కు మించి తీసుకోనని, కానీ 'గరివిడి లక్ష్మి' పాత్ర కోసం మొదటిసారి ప్రత్యేక వర్క్‌షాప్‌లో పాల్గొనాల్సి వచ్చిందని ఆనంది పేర్కొన్నారు.

ఉత్తరాంధ్ర యాసను, అక్కడి పదాలను పట్టుకోవడం కాస్త కష్టమైనప్పటికీ, వేదికపై బుర్రకథ చెప్పే విధానం మరియు కళాకారుల హావభావాలు, ఉత్సాహాన్ని ఒంటపట్టించుకోవడానికి అనేక వీడియోలు చూసి, ప్రత్యక్షంగా కొందరు కళాకారులను కూడా కలిశానని చెప్పారు. పాత్రలో జీవించేందుకు తగినంత శిక్షణ మరియు ప్రిపరేషన్ పొందిన తర్వాతే కెమెరా ముందుకు వచ్చానని వివరించారు.సినిమా రంగంలో కేవలం కథానాయిక పాత్రలకే పరిమితం కాకుండా, ప్రాధాన్యం ఉన్న ఎలాంటి పాత్రలైనా చేయడానికి తాను సిద్ధంగా ఉన్నానని ఆనంది స్పష్టం చేశారు.

ఛాలెంజింగ్‌గా అనిపించే నెగిటివ్ షేడ్స్ ఉన్న పాత్రల్లో నటించేందుకు కూడా తనకు ఎలాంటి అభ్యంతరం లేదని పేర్కొన్నారు. కొన్నేళ్ల క్రితం తమిళ కో-డైరెక్టర్ సోక్రటీస్‌ను పెళ్లి చేసుకున్నానని, ప్రస్తుతం తమకు నాలుగేళ్ల బాబు ఉన్నాడని, కుటుంబ సభ్యులు మరియు భర్త నుంచి లభిస్తున్న ప్రోత్సాహంతోనే పెళ్లి తర్వాత కూడా వరుస చిత్రాలలో నటిస్తూ ముందుకెళ్తున్నానని ఆనంది చెప్పుకొచ్చారు.

Also Read: చిన్న సినిమాలను చంపేస్తున్నారు.. టాలీవుడ్ ప్రముఖులపై హీరో షిరాజ్ మెహదీ సంచలన ఆరోపణలు!