చిన్న సినిమాలను చంపేస్తున్నారు.. టాలీవుడ్ ప్రముఖులపై హీరో షిరాజ్ మెహదీ సంచలన ఆరోపణలు!

సూర్య ఎంటర్‌టైన్‌మెంట్ డెస్క్: టాలీవుడ్‌లో చిన్న సినిమాల నిర్మాతలు ఎదుర్కొంటున్న సమస్యలపై ఓ అందాల రాక్షసీ నటుడు, నిర్మాత షిరాజ్ మెహదీ చేసిన సంచలన వ్యాఖ్యలు ప్రస్తుతం సినీ వర్గాల్లో తీవ్ర చర్చనీయాంశంగా మారాయి. సినిమా నిర్మాణం పూర్తి చేయడం ఎంత కష్టమో, ఆ తర్వాత దాన్ని థియేటర్లలో విడుదల చేసి నిలదొక్కుకోవడం అంతకంటే పెద్ద సవాల్‌గా మారిందని ఆయన ఆవేదన వ్యక్తం చేశారు. పెట్టుబడులు పెట్టి, అప్పులు చేసి సినిమాలు తీస్తున్న చిన్న నిర్మాతలకు సరైన సమయంలో థియేటర్లు దొరక్కపోవడం, ఓటీటీ మరియు శాటిలైట్ హక్కులు విక్రయించుకునే అవకాశాలు పూర్తిగా మూసుకుపోవడం వెనుక కొందరి ప్రమేయం ఉందంటూ తీవ్రంగా మండిపడ్డారు.

సినిమా తీయడమే నిర్మాతలు చేసిన నేరమన్నట్లుగా టాలీవుడ్‌లో కొందరు ప్రముఖులు వ్యవహరిస్తున్నారని షిరాజ్ మెహదీ ఆరోపించారు. ఫిలిం చాంబర్ వేదికగా చిన్న సినిమాల సమస్యలను పట్టించుకోవాల్సిన బాధ్యతను విస్మరించి, తమకు సంబంధం లేదన్న ధోరణి ప్రదర్శించడం దురదృష్టకరమని పేర్కొన్నారు. కేవలం పెద్ద సినిమాలకు మాత్రమే పెద్దపీట వేస్తూ, చిన్న చిత్రాల ప్రయోజనాలను దెబ్బతీస్తున్నారని ధ్వజమెత్తారు. తెలుగు ఫిలిం చాంబర్ స్థానంలో తెలంగాణ విభాగాన్ని ప్రత్యేకంగా ఏర్పాటు చేయాలని డిమాండ్ చేస్తూ, ఈ సమస్యలపై తాము పలువురు ప్రముఖులకు మరియు సంస్థలకు లీగల్ నోటీసులు, గ్రీవెన్స్ పిటిషన్లు పంపినప్పటికీ ఎలాంటి స్పందన రాలేదని వెల్లడించారు.

చిన్న సినిమాల వెనుక ఎంతోమంది శ్రామికులు, నటీనటులు, సాంకేతిక నిపుణుల కుటుంబాల భవిష్యత్తు ముడిపడి ఉంటుందని ఆయన గుర్తుచేశారు. ఒక రైతు నష్టపోతే సమాజం స్పందించినట్లుగానే, సినిమా కోసం సర్వస్వం కోల్పోతున్న చిన్న నిర్మాతలను కూడా మానవీయ కోణంలో చూడాలని కోరారు. ఇటువంటి క్లిష్ట పరిస్థితుల్లో తెలంగాణ ముఖ్యమంత్రి రేవంత్ రెడ్డి స్వయంగా జోక్యం చేసుకుని చిన్న సినిమాలను ఆదుకోవాలని విజ్ఞప్తి చేశారు. చిన్న బడ్జెట్ చిత్రాలకు ప్రభుత్వ సబ్సిడీలు అందించడం, థియేటర్ల కేటాయింపుల్లో సంపూర్ణ పారదర్శకతను తీసుకురావడం ద్వారానే వర్ధమాన సినీ కళాకారులను కాపాడుకోగలమని అభిప్రాయపడ్డారు.

Also Read: ప్రముఖ రచయిత సాదత్ హసన్ మంటో సాహిత్య ఆధారంగా బాంబే స్టోరీస్ మూవీ రివ్యూ!