భారత్‌లో ఆర్‌ అండ్ డీ విస్తరణకు యూనిలీవర్ ₹315 కోట్లు
సూర్య బిజినెస్ డెస్క్: ప్రముఖ అంతర్జాతీయ ఎఫ్‌ఎంసీజీ దిగ్గజం యూనిలీవర్, భారతదేశంలో తన పరిశోధన మరియు అభివృద్ధి కార్యకలాపాలను మరింత వేగవంతం చేసేందుకు 35 మిలియన్ యూరోల (సుమారు రూ. 315 కోట్లు) తాజా పెట్టుబడులను ప్రకటించింది. దేశంలోని సైంటిఫిక్ టాలెంట్, ఇన్నోవేషన్ ఎకోసిస్టమ్‌పై గల నమ్మకంతో ముంబై, బెంగళూరులలో ఉన్న తమ ఆర్‌ అండ్ డీ కేంద్రాలను అత్యాధునిక సాంకేతిక పరిజ్ఞానంతో ఆధునీకరించేందుకు ఈ నిధులను వెచ్చించనున్నట్లు సంస్థ వెల్లడించింది.
ఈ నూతన వ్యూహంలో భాగంగా ముంబై కేంద్రాన్ని ఆర్టిఫిషియల్ ఇంటెలిజెన్స్ , డిజిటల్ మోడలింగ్ మరియు ర్యాపిడ్ ప్రోటోటైపింగ్‌తో కూడిన సమగ్ర ప్రొడక్ట్ ఇన్నోవేషన్ సెంటర్‌గా అభివృద్ధి చేయనున్నారు. తద్వారా అంతర్జాతీయ మార్కెట్లకు అవసరమైన ఉత్పత్తుల రూపకల్పన ప్రక్రియను మరింత వేగవంతం చేయాలని లక్ష్యంగా పెట్టుకున్నారు. మరోవైపు, బెంగళూరు కేంద్రాన్ని గ్లోబల్ సైన్స్ అండ్ టెక్నాలజీ హబ్‌గా బలోపేతం చేయనున్నారు. రాబోయే ఐదేళ్ల కాలంలో దేశీయ బయోసైన్స్ పరిశోధనలను ప్రోత్సహించేందుకు ‘బయో-ఫ్యూచర్స్ పార్టనర్‌షిప్’ పేరిట ప్రత్యేకంగా 5 మిలియన్ యూరోలను కేటాయించారు.
యూనిలీవర్ అంతర్జాతీయ ఆర్‌ అండ్ డీ నెట్‌వర్క్‌లో భారతదేశం అత్యంత కీలకమైన భాగస్వామిగా కొనసాగుతోందని, ఇక్కడి కేంద్రాల్లో ఇప్పటికే 800 మందికి పైగా శాస్త్రవేత్తలు, డిజిటల్ నిపుణులు పనిచేస్తున్నారని సంస్థ స్పష్టం చేసింది. భారత్‌లో విస్తరిస్తున్న బయోటెక్నాలజీ, బయో మాన్యుఫ్యాక్చరింగ్ అవకాశాలను అందిపుచ్చుకుంటూ అంతర్జాతీయ ప్రమాణాలతో కూడిన సరికొత్త ఉత్పత్తులను ప్రపంచ వినియోగదారులకు అందించేందుకు ఈ పెట్టుబడులు ఎంతగానో తోడ్పడతాయని యాజమాన్యం ఆశాభావం వ్యక్తం చేసింది.
