నవంబర్ 1 నుంచి మొబైల్ యూజర్లకు కొత్త రూల్: ఇన్‌కమింగ్ కాల్స్‌పై కాలర్ అసలు పేరు డిస్‌ప్లే..
సూర్య టెక్నాలజీ & పాలసీ డెస్క్, న్యూఢిల్లీ: దేశంలోని మొబైల్ వినియోగదారుల భద్రతను పెంపొందించడం మరియు అపరిచిత స్పామ్, ఫ్రాడ్ కాల్స్‌కు చెక్ పెట్టే లక్ష్యంతో కేంద్ర టెలికమ్యూనికేషన్ల శాఖ కీలక నిర్ణయం తీసుకుంది. నవంబర్ 1 నుంచి దేశవ్యాప్తంగా ‘కాలింగ్ నేమ్ ప్రెజెంటేషన్’ వ్యవస్థను తప్పనిసరిగా అమలు చేయాలని అన్ని టెలికాం ఆపరేటర్లను ఆదేశించింది. దీని ప్రకారం, ఎవరైనా ఫోన్ చేసినప్పుడు వారి నంబర్‌తో పాటు అధికారిక పేరు కూడా స్క్రీన్‌పై ప్రత్యక్షమవుతుంది.
సీఎన్‌ఏపీ ఎలా పనిచేస్తుంది?:
సేవ్ చేసిన కాంటాక్ట్‌లు: ఒకవేళ ఇన్‌కమింగ్ కాల్ నంబర్ మీ మొబైల్ కాంటాక్ట్ లిస్ట్‌లో ముందే సేవ్ అయి ఉంటే, మీరు సేవ్ చేసుకున్న పేరే డిస్‌ప్లే అవుతుంది.
తెలియని నంబర్లు మీ ఫోన్‌లో నంబర్ సేవ్ లేకపోతే, సదరు కాలర్ సిమ్ కార్డు తీసుకునే సమయంలో కేవైసీ ఆధారంగా టెలికాం ఆపరేటర్ల వద్ద నమోదు చేసిన అసలు పేరు నేరుగా స్క్రీన్‌పై కనిపిస్తుంది.
బిజినెస్ కాల్స్:టెలిమార్కెటింగ్ లేదా వ్యాపార సంస్థల నుంచి వచ్చే కాల్స్‌కు వాటి ట్రేడ్‌మార్క్ లేదా జీఎస్టీ పోర్టల్‌లో నమోదైన అధికారిక వ్యాపార పేరు డిస్‌ప్లే అవుతుంది.
థర్డ్ పార్టీ యాప్‌ల అవసరం లేకుండానే నెట్‌వర్క్ ఆధారిత రక్షణ:
ప్రస్తుతం ట్రూకాలర్ వంటి థర్డ్ పార్టీ యాప్‌లపై ఆధారపడుతున్న యూజర్లకు, ఇకపై ఎలాంటి యాప్స్ లేకుండానే నేరుగా 4G, 5G నెట్‌వర్క్ స్థాయిలోనే ఈ సదుపాయం లభించనుంది. సైబర్ మోసాలు, నకిలీ గుర్తింపులతో వచ్చే స్పామ్ కాల్స్ మరియు బెదిరింపులను అరికట్టేందుకు ఈ విధానం ఎంతగానో ఉపయోగపడుతుందని కేంద్ర ప్రభుత్వం స్పష్టం చేసింది.
