కాన్వా లేఆఫ్స్: 6 నెలల జీతం, మ్యాక్‌బుక్ గిఫ్ట్
సూర్య కార్పొరేట్ డెస్క్, సిడ్నీ: గ్లోబల్ టెక్ రంగంలో ఉద్యోగుల తొలగింపులు సర్వసాధారణంగా మారిన వేళ, ఆస్ట్రేలియాకు చెందిన ప్రముఖ డిజైన్ ప్లాట్‌ఫామ్ దిగ్గజం 'కాన్వా' తీసుకున్న నిర్ణయం కార్పొరేట్ ప్రపంచంలో సరికొత్త చర్చకు దారితీసింది. కంపెనీ అంతర్గత పునర్వ్యవస్థీకరణలో భాగంగా తప్పనిసరి పరిస్థితుల్లో కొందరు ఉద్యోగులను తొలగించాల్సి వచ్చినప్పటికీ, వారికి అందించిన నిష్క్రమణ ప్యాకేజీ నెటిజన్లను, హెచ్ఆర్ నిపుణులను విశేషంగా ఆకట్టుకుంటోంది.
ఉద్యోగం కోల్పోయిన సిబ్బంది ఆర్థికంగా ఇబ్బంది పడకుండా ఉండేందుకు సంస్థలో పనిచేసిన కాలంతో సంబంధం లేకుండా ప్రతి ఒక్కరికీ కనీసం ఆరు నెలల పూర్తి వేతనాన్ని సెవెరెన్స్ పేగా అందించారు. సీనియారిటీ ఆధారంగా కొందరికి ఇది మరింత ఎక్కువగా లభించింది.
సాధారణంగా లేఆఫ్స్ సమయంలో కంపెనీ ల్యాప్‌టాప్‌లు, ఇతర పరికరాలను తక్షణమే వెనక్కి తీసుకుంటారు. అయితే కాన్వా ఉద్యోగులు వాడుతున్న యాపిల్ మ్యాక్‌బుక్‌లను వారికే ఉచితంగా ఉంచుకునే వెసులుబాటు కల్పించింది. దీనివల్ల వారు కొత్త ఉద్యోగాన్వేషణ, నైపుణ్యాల పెంపు కోసం సొంతంగా ల్యాప్‌టాప్ కొనుగోలు చేయాల్సిన భారం తప్పింది.
వీటితో పాటు ఉద్యోగులు, వారి కుటుంబ సభ్యుల కోసం రాబోయే ఆరు నెలల పాటు పూర్తి వైద్య బీమా ప్రీమియంను సంస్థే భరించనుంది. అలాగే తొలగించిన సిబ్బంది త్వరగా ఇతర టెక్ కంపెనీలలో స్థిరపడేందుకు ప్రొఫెషనల్ కెరీర్ కోచింగ్, రెజ్యూమ్ తయారీ, ఇంటర్వ్యూ ప్రిపరేషన్ సేవలను ప్రత్యేక ఏజెన్సీల ద్వారా ఏర్పాటు చేశారు. ఉద్యోగం తొలగించినప్పటికీ యాజమాన్యం తమను అత్యంత మానవీయ కోణంలో, గౌరవప్రదంగా సాగనంపిందని మాజీ ఉద్యోగులు సోషల్ మీడియా వేదికగా సంస్థను కొనియాడారు.
