వైభవంగా ప్రారంభమైన చిన వెంకన్న బ్రహ్మోత్సవాలు

ద్వారకాతిరుమల మేజర్ న్యూస్: ద్వారకాతిరుమల శ్రీ వెంకటేశ్వర స్వామి వారి ఆశ్వయుజ మాస తిరు కళ్యాణ మహోత్సవాలు బుధవారం అత్యంత వైభవంగా ప్రారంభమయ్యాయి. ఉదయం శ్రీ వెంకటేశ్వర స్వామి వారిని పెండ్లి కుమారుడు గాను, శ్రీదేవి భూదేవి అమ్మవార్లను పెండ్లి కుమార్తెలుగాను చేశారు. తొలుత ఆలయ ప్రాంగణాన్ని రకరకాల సుగంధ పుష్పమాలికలతో, మామిడి తోరణాలతో, అరటి బోదెలతో అలంకరించారు. ఉత్సవాలు సాంప్రదాయ బద్ధంగా ఆలయ కార్య నిర్వహణ అధికారి వెండ్ర త్రినాధ రావు జ్యోతి ప్రజ్వలన చేసి కార్యక్రమాన్ని ప్రారంభించారు. అమ్మవార్లను అంతకు ముందే ఏర్పాటుచేసిన రజిత సింహాసనం పై ఉంచారు.వేదమంత్రాలు, భాజా భజంత్రీలు, మధ్య స్వామి వారిని అమ్మవార్లను పెండ్లి కుమారుడు, పెండ్లి కుమార్తెలుగా, చేయడంతో స్వామివారి బ్రహ్మోత్సవాలు ప్రారంభమయ్యాయి. అనంతరం ఆలయంలో కోలాట భజనలు వేద పారాయణలు, ఆలయ నిలయ విధ్వాన్సులచే  నాదస్వర కచేరి కార్యక్రమాలను నిర్వహించారు. రాత్రి 7 గంటలకు బ్రహ్మోత్సవాల్లో భాగంగా స్వామివారిని అమ్మవార్లను గజవాహనంపై ఉంచి బ్రహ్మోత్సవం నిర్వహించారు.