"ఉప్పాడ" వ్యూహం! * రాజకీయ చతురతకు నిదర్శనం *

భోగాపురం, సూర్య : స్థానిక రాజకీయాల్లో పరిస్థితులకు అనుగుణంగా వ్యూహాలు రచించడం, అనుకూల సమయాన్ని అందిపుచ్చుకోవడంలో వైఎస్సార్‌సీపీ మండల అధ్యక్షుడు, సీనియర్‌ నాయకుడు ఉప్పాడ సూర్యనారాయణరెడ్డి తనదైన శైలిని ప్రదర్శిస్తున్నారు. మారిన ఎన్నికల నిబంధనలను రాజకీయ అవకాశంగా మలుచుకుంటూ, మరోసారి ఎన్నికల బరిలోకి దిగేందుకు సిద్ధమయ్యారు. గతంలో సవరవిల్లి ఎంపీటీసీగా విజయం సాధించిన ఆయన, ఈసారి అదే స్థానం నుంచి వైఎస్సార్‌సీపీ అభ్యర్థిగా పోటీ చేయనున్నారు. 1995 తర్వాత ముగ్గురు పిల్లల నిబంధన అమల్లోకి రావడంతో ఎన్నికల్లో పోటీకి దూరమైన సూర్యనారాయణరెడ్డికి, ప్రస్తుత ఎన్నికల్లో ఆ నిబంధన తొలగింపుతో మళ్లీ అవకాశం లభించింది. దీంతో తన రాజకీయ అనుభవాన్ని మరోసారి ప్రజాక్షేత్రంలో పరీక్షించుకునేందుకు ఆయన సిద్ధమవుతున్నారు. ఆయన సతీమణి కూడా అమటాం రాయివలస ఎంపీటీసీ స్థానానికి పోటీ చేయనున్నారు. గతంలో ఆమె సవరవిల్లి ఎంపీటీసీగా విజయం సాధించారు. మండల రాజకీయాలపై అవగాహన, స్థానిక పరిస్థితులపై పట్టుతో ఉప్పాడ సూర్యనారాయణరెడ్డి ఎన్నికల వేళ తీసుకుంటున్న నిర్ణయాలు ఆసక్తిని రేకెత్తిస్తున్నాయి. భార్యాభర్తలు వేర్వేరు ఎంపీటీసీ స్థానాల నుంచి బరిలోకి దిగుతుండటంతో భోగాపురం మండల రాజకీయాల్లో ఈ పరిణామం చర్చనీయాంశంగా మారింది. అభ్యర్థుల ఎంపిక నుంచి ఎన్నికల వ్యూహాల వరకు తనదైన రాజకీయ చతురతను ప్రదర్శించే సూర్యనారాయణరెడ్డి, ఈ ఎన్నికల్లో ఎలాంటి ఫలితాన్ని సాధిస్తారో వేచి చూడాలి.

రిపోర్టర్ : వై శ్రీనివాస రావు, భోగాపురం, విజయనగరం జిల్లా.