సేవా సేతు అభియాన్‌పై.. వినియోగదారులకు అవగాహన..

సోలార్ విద్యుత్ వ్యవస్థల ఏర్పాటుకు బ్యాంకు రుణాలు   ఏడు రోజుల్లోపు సబ్సిడీ మొత్తాలు ఖాతాల్లో జమ   సోలార్ ప్రయోజనాలను ఇంటింటికీ వివరించాలి   జిల్లా సూపరింటెండింగ్ ఇంజనీర్  పి. సుధాకర్

నెల్లూరు, వేదాయపాలెం, మేజర్ న్యూస్  :   నెల్లూరు టౌన్ డివిజన్ పరిధిలోని ఐఈ సెక్షన్ నందు సేవా సేతు అభియాన్ పథకంపై జిల్లా సూపరింటెంటింగ్ ఇంజనీరు పి సుధాకర్ ఆధ్వర్యంలో అవగాహన సదస్సు నిర్వహించారు. ఈ సందర్భంగా  వినియోగదారులకు విద్యుత్ సేవలు, సోలార్ విద్యుత్ వ్యవస్థల ఏర్పాటు మరియు ప్రభుత్వం అందిస్తున్న రాయితీలపై వివరించారు. అనంతరం జిల్లా సూపరింటెండింగ్ ఇంజనీర్ పి. సుధాకర్ మాట్లాడుతూ.., సోలార్ విద్యుత్ వ్యవస్థల ఏర్పాటు కోసం బ్యాంకులు సులభంగా రుణాలు మంజూరు చేస్తున్నాయని, అలాగే ప్రభుత్వం అందిస్తున్న సబ్సిడీ మొత్తాలు కూడా త్వరితగతిన లబ్ధిదారుల ఖాతాల్లో జమ అవుతున్నాయని తెలిపారు.  గరిష్టంగా 3 కిలోవాట్ల సోలార్ విద్యుత్ వ్యవస్థకు రూ.78,000 వరకు, 2 కిలోవాట్లకు రూ.60,000 వరకు, 1 కిలోవాట్ కు రూ.30,000 వరకు సబ్సిడీ లభిస్తుందని, అర్హత కలిగిన లబ్ధిదారుల ఖాతాల్లో సబ్సిడీ మొత్తం వారం రోజులలోపు జమ అయ్యేలా చర్యలు తీసుకుంటున్నట్లు వివరించారు.  సోలార్ విద్యుత్ వ్యవస్థల వల్ల వినియోగదారులకు విద్యుత్ ఖర్చులు తగ్గడంతో పాటు, పర్యావరణ పరిరక్షణకు కూడా దోహదపడుతుందని తెలిపారు. ఈ ప్రయోజనాలను ప్రజలకు విస్తృతంగా తెలియజేయాల్సిన బాధ్యత విద్యుత్ శాఖ సిబ్బంది, O&M సిబ్బంది మరియు వెండర్లపై ఉందన్నారు.  ఓ అండ్ఎం సిబ్బంది తమ డిస్ట్రిబ్యూషన్ పరిధిలో ఇంటింటికీ వెళ్లి వినియోగదారులకు సోలార్ విద్యుత్ వ్యవస్థల ప్రయోజనాలు, సబ్సిడీ వివరాలు మరియు దరఖాస్తు ప్రక్రియపై అవగాహన కల్పించాలని సూచించారు.  అలాగే విద్యుత్ శాఖ సిబ్బంది గ్రామీణ ప్రాంతాల ప్రజలకు ఎల్లప్పుడూ అందుబాటులో ఉంటారని, వినియోగదారుల సమస్యలను పరిష్కరించేందుకు సిబ్బంది నిరంతరం పనిచేస్తారని తెలిపారు. సోలార్ వ్యవస్థల ఏర్పాటుకు సంబంధించిన పనులను వెండర్లు కూడా వేగవంతంగా పూర్తి చేసేలా సిద్ధంగా ఉండాలని సూచించారు.  ఈ కార్యక్రమంలో ఎగ్జిక్యూటివ్.. డిప్యూటీ ఎగ్జిక్యూటివ్..అసిస్టెంట్ ఇంజనీర్లు.. జూనియర్ ఇంజనీర్లు..సిబ్బంది పాల్గొన్నారు.