తాగేందుకు గుక్కెడు నీళ్లు లేక ప్రజలు ఇబ్బందులు

నగరం, మేజర్ న్యూస్:

స్థానిక మండల పరిధిలోని అద్దంకివారిపాలెంలో తాగేందుకు గుక్కెడు నీళ్లు లేక గ్రామ ప్రజలు ఎంతో కాలంగా  తీవ్ర ఇబ్బందులు పడుతున్నారు. తాగునీటి కోసం కోట్లాది రూపాయrలు వెచ్చించి వాటర్ ట్యాంక్ నిర్మాణం చేసి గ్రామంలో పైపులైన్ ద్వారా ప్రతి ఇంటికి తాగునీరు సరఫరా చేద్దామన్న ఆశయం అంతంతమాత్రంగానే ఉంది. మరోవైపు పైప్ లైన్ సక్రమంగా లేనందున అర కోరగా వచ్చిన నీరు కాస్త వీధి కొళాయిలు పనిచేయక రోడ్లపై నీరు వృథాగా ప్రవహిస్తోంది. గ్రామానికి తూర్పు వైపున గల సుమారు 20 గృహాలకు తాగునీరు అందించుటలో అధికారులు పూర్తిగా విఫలమయ్యారు. పైప్ లైన్ కొంతకాలంగా విరిగి పోయినప్పటికి బాగు చేసేందుకు సంబంధిత అధికారులు ఏమాత్రం శ్రద్ధ చూపలేదనే ఆరోపణలు వినిపిస్తున్నాయి. సమస్య తీవ్రతను అధికారుల దృష్టికి ఎన్ని పర్యాయాలు తీసుకువెళ్లిన ఫలితం లేదని గ్రామస్తులు ఆవేదన వ్యక్తం చేస్తున్నారు. ఎప్పటికైనా సంబంధిత అధికారులు పాడైపోయిన కుళాయిలు బాగు చేసి గ్రామస్తులకు సక్రమంగా తాగునీరు అందించాలని ప్రజలు కోరారు.