సర్వర్ సమస్యతో జాప్యం.కావాలనే ఆందోళనకు దిగారు. మున్సిపల్ కమిషనర్.
కళ్యాణదుర్గం: మున్సిపల్ కార్యాలయంలో వైఎస్సార్‌సీపీ చైర్‌పర్సన్‌ అభ్యర్థి దొడగట్ట హర్షిణి బైఠాయించి ఆందోళనకు దిగిన ఘటనపై మున్సిపల్ కమిషనర్ స్పందించారు. నామినేషన్‌కు అవసరమైన పత్రాలు అందించడంలో జాప్యం జరిగిందన్న ఆరోపణలపై ఆయన వివరణ ఇచ్చారు. సర్వర్ నెమ్మదిగా పనిచేయడం వల్ల కొంత ఆలస్యం జరిగిన మాట వాస్తవమేనని, అయితే దీనిని ఆసరాగా చేసుకుని వైఎస్సార్‌సీపీ నాయకులు ఉద్దేశపూర్వకంగా అలజడి సృష్టించారని ఆరోపించారు. మున్సిపల్ అధికారులకు ఎవరి పట్లా ప్రేమ, ద్వేషం లేదని, నిబంధనల ప్రకారమే విధులు నిర్వహిస్తున్నామని స్పష్టం చేశారు. అవసరమైన పత్రాలను రాత్రి 10 గంటలైనా సరే అందించి పంపిస్తామని చెప్పినప్పటికీ వైఎస్సార్‌సీపీ నాయకులు వినిపించుకోలేదని, కావాలనే ఆందోళనకు దిగారని కమిషనర్ పేర్కొన్నారు. సాంకేతిక సమస్య కారణంగా ఏర్పడిన ఆలస్యాన్ని రాజకీయ వివాదంగా మార్చడం సరికాదని మున్సిపల్ వర్గాలు అభిప్రాయపడుతున్నాయి. మరోవైపు, నామినేషన్‌ ప్రక్రియలో అవసరమైన పత్రాలు సకాలంలో అందకపోవడంపై వైఎస్సార్‌సీపీ అభ్యర్థి ఆందోళన వ్యక్తం చేసిన నేపథ్యంలో మున్సిపల్ కార్యాలయంలో ఉద్రిక్త పరిస్థితులు నెలకొన్నాయి. ఎన్నికల ప్రక్రియలో అభ్యర్థులకు అవసరమైన పత్రాలు సకాలంలో అందేలా అధికారులు చర్యలు తీసుకోవాలని రాజకీయ వర్గాలు కోరుతున్నాయి. ఈ ఘటనపై అధికారుల వివరణతో పాటు అభ్యర్థి ఆరోపణల నేపథ్యంలో నామినేషన్‌ ప్రక్రియ పారదర్శకంగా సాగడంపై చర్చ జరుగుతోంది.
కళ్యాణదుర్గం టౌన్ రిపోర్టర్ :-రంగస్వామి.
