సైనికుడిగా సాగిన ప్రస్థానానికి ఘనమైన సెల్యూట్..!

నరసన్నపేట, సూర్య : మాతృభూమి రక్షణే పరమావధిగా భావించి, సరిహద్దుల్లో రేయింబవళ్లు విధులు నిర్వహిస్తూ దేశ ప్రజల ప్రశాంత జీవనం కోసం సేవలందించిన సైనికుల జీవితం ప్రతి ఒక్కరికీ స్ఫూర్తిదాయకమని ప్రభుత్వ ప్రధానోపాధ్యాయులు పాగోటి రామకృష్ణ పేర్కొన్నారు. భారత సైన్యంలో లెఫ్టినెంట్ కల్నల్‌గా విశేష సేవలందించి పదవీ విరమణ అనంతరం మంగళవారం స్వగ్రామమైన నర్సింగపల్లికి చేరుకున్న పాగోటి సన్యాసిరావుకు గ్రామ ప్రజలు ఘన స్వాగతం పలికారు. గ్రామంలో ఊరేగింపు నిర్వహించి, అనంతరం రచ్చబండ వద్ద గ్రామస్థుల ఆధ్వర్యంలో పౌర సన్మాన కార్యక్రమాన్ని ఏర్పాటు చేశారు. ఈ సందర్భంగా ఆయన సోదరుడు, ప్రభుత్వ ప్రధానోపాధ్యాయులు పాగోటి రామకృష్ణ మాట్లాడుతూ.. దేశ సేవకు అంకితమైన సైనికుడి ఉద్యోగానికి మాత్రమే పదవీ విరమణ ఉంటుందని, దేశం పట్ల బాధ్యతకు ఎప్పటికీ విరామం ఉండదని అన్నారు. సైనికుడిగా దేశానికి అందించిన సేవల అనంతరం తన అనుభవాన్ని సమాజ సేవకు వినియోగించాలని ఆకాంక్షించారు. ఆయన అనుభవం యువతకు మార్గదర్శకంగా నిలవాలని, ధైర్యసాహసాలు భావితరాలకు స్ఫూర్తినివ్వాలని కోరారు. ఈ కార్యక్రమంలో సన్యాసిరావు స్నేహితులు, బంధువులు, గ్రామ పెద్దలు, ఉపాధ్యాయులు, గ్రామస్థులు పాల్గొని ఆయనను ఘనంగా సత్కరించారు.