పుస్తక జ్ఞానంతో పాటు క్షేత్రస్థాయి అనుభవానికి ప్రాధాన్యం

నేటి దినపత్రిక సూర్య బ్యూరో రాజమహేంద్రవరంవిద్యార్థుల్లో వృత్తి నైపుణ్యాలను పెంపొందించి, భవిష్యత్తులో మెరుగైన ఉపాధి అవకాశాలను అందిపుచ్చుకునేలా తీర్చిదిద్దడమే ఇంటర్న్‌షిప్ కార్యక్రమం ప్రధాన లక్ష్యమని పీఎం శ్రీ గౌతమి మున్సిపల్ హైస్కూల్ ప్రధానోపాధ్యాయుడు డి.శ్రీనివాస్ తెలిపారు.జిల్లా సమగ్ర శిక్ష అభియాన్ ఆధ్వర్యంలో వొకేషనల్ విద్యలో భాగంగా మండపేట పీఎం శ్రీ గౌతమి మున్సిపల్ హైస్కూల్‌లో పదో తరగతి చదువుతున్న విద్యార్థులకు దసరా సెలవుల్లో పది రోజులపాటు ప్రత్యేక ఇంటర్న్‌షిప్ కార్యక్రమాన్నినిర్వహిస్తున్నారు.ప్రధానోపాధ్యాయుడు డి.శ్రీనివాస్ పర్యవేక్షణలో ఆటోమోటివ్ ట్రేడ్‌కు సంబంధించి స్థానికంగా ఎంపిక చేసిన ఆటోమొబైల్ వర్క్‌షాపులు, ఫోర్ వీలర్ రిపేరింగ్ షాపుల్లో విద్యార్థులకు ప్రత్యక్ష శిక్షణ అందిస్తున్నారు. ఈ సందర్భంగా ఆయన మాట్లాడుతూ ఆటోమొబైల్ వర్క్‌షాపుల్లో పనిచేసే విధానం, కార్ల విడిభాగాలు, ఇంజిన్ పనితీరు, మరమ్మతుల ప్రక్రియతో పాటు పని ప్రదేశాల్లో పాటించాల్సిన భద్రతా నియమాలపై విద్యార్థులకు అవగాహన కల్పిస్తున్నట్లు వివరించారు. తరగతి గదుల్లో నేర్చుకున్న పుస్తక జ్ఞానాన్ని క్షేత్రస్థాయిలో అన్వయించుకునేందుకు ఇటువంటి కార్యక్రమాలు ఎంతగానో దోహదపడతాయన్నారు.వొకేషనల్ ట్రైనర్ వై.ఎస్.రాజు మాట్లాడుతూ విద్యార్థి దశ నుంచే వృత్తి విద్యపై అవగాహన పెంపొందించుకోవడం ద్వారా భవిష్యత్తులో స్వయం ఉపాధి అవకాశాలను సృష్టించుకోవచ్చన్నారు. సాంకేతిక పరిజ్ఞానంతో పాటు ఆచరణాత్మక నైపుణ్యాలను అలవర్చుకుంటే ఉద్యోగ అవకాశాల్లో ముందంజలో నిలవవచ్చని పేర్కొన్నారు. విద్యార్థులు ఈ అవకాశాన్ని సద్వినియోగం చేసుకుని ఆయా రంగాల్లో నైపుణ్యం సాధించాలని సూచించారు.