పరిషత్‌ పోలింగ్‌కు స్థానిక సెలవులు * కలెక్టర్ స్వప్నిల్‌ దినకర్‌ పుండ్కర్‌ ఉత్తర్వులు *
శ్రీకాకుళం, సూర్య : జిల్లాలో నవంబర్‌ 5వ తేదీన జరగనున్న జడ్పీటీసీ, ఎంపీటీసీ సాధారణ ఎన్నికల పోలింగ్‌ సందర్భంగా ఎన్నికలు జరిగే ప్రాంతాల్లో స్థానిక సెలవులు ప్రకటిస్తూ జిల్లా కలెక్టర్, జిల్లా ఎన్నికల అధికారి స్వప్నిల్‌ దినకర్‌ పుండ్కర్‌ సోమవారం అధికారిక ఉత్తర్వులు జారీ చేశారు. పోలింగ్‌ కేంద్రాలుగా కేటాయించిన ప్రభుత్వ, ప్రైవేటు భవనాలు, విద్యాసంస్థలకు పోలింగ్‌ ముందు రోజైన నవంబర్‌ 4, పోలింగ్‌ రోజైన నవంబర్‌ 5వ తేదీల్లో (రెండు రోజులు) స్థానిక సెలవు ప్రకటించారు. పోలింగ్‌ సామగ్రి పంపిణీ, బూత్‌ల ఏర్పాటుకు అనువుగా ఈ నిర్ణయం తీసుకున్నారు.
ఎన్నికలు జరిగే పరిధిలోని అన్ని ప్రభుత్వ కార్యాలయాలు, స్థానిక సంస్థలు, ఇతర ప్రభుత్వ అనుబంధ సంస్థలకు నవంబర్‌ 5వ తేదీన స్థానిక సెలవు అమల్లో ఉంటుందని కలెక్టర్ స్పష్టం చేశారు. అలాగే నెగోషియబుల్‌ ఇన్‌స్ట్రుమెంట్స్‌ యాక్ట్‌-1881, ఏపీ షాప్స్‌ అండ్‌ ఎస్టాబ్లిష్‌మెంట్స్‌ యాక్ట్‌-1988 నిబంధనల ప్రకారం.. జిల్లా పరిధిలోని ప్రభుత్వ, ప్రైవేటు రంగ సంస్థలు, కర్మాగారాలు, వ్యాపార, వాణిజ్య దుకాణాల్లో పనిచేసే ఉద్యోగులు, కార్మికులు తమ ఓటు హక్కును వినియోగించుకునేందుకు వీలుగా నవంబర్‌ 5న వేతనంతో కూడిన సెలవు మంజూరు చేయాలని యజమాన్యాలను ఆదేశించారు. ఉద్యోగులకు ఓటు హక్కు కల్పించడంలో ఎలాంటి నిబంధనలు ఉల్లంఘించినా కఠిన చర్యలు ఉంటాయని హెచ్చరించారు.
