పర్చూరులో రూ.25.29 కోట్లతో అభివృద్ధి పనులు •మంత్రి అనగాని, ఎమ్మెల్యే ఏలూరికి అడుగడుగునా ప్రజల నీరాజనం
ఇంకొల్లు:
పర్చూరు నియోజకవర్గంలో అభివృద్ధి పనులకు మరో ముందడుగు పడింది. మార్టూరు, ఇంకొల్లు మండలాల పరిధిలో సుమారు రూ.25.29 కోట్లతో చేపట్టిన పలు అభివృద్ధి పనులను రాష్ట్ర రెవెన్యూ శాఖ మంత్రి అనగాని సత్యప్రసాద్, ఎమ్మెల్యే ఏలూరి సాంబశివరావు ప్రారంభించారు. మార్టూరు నుంచి ఇంకొల్లు వరకు మార్గమధ్యంలోని గ్రామాల్లో ప్రజలు రహదారులపైకి వచ్చి పూలవర్షం కురిపిస్తూ, ఘనస్వాగతం పలికారు. మంత్రి అనగాని, ఎమ్మెల్యే ఏలూరి ప్రజలకు అభివాదం చేస్తూ ముందుకు సాగారు. ప్రజలను ఆప్యాయంగా పలకరిస్తూ వారి యోగక్షేమాలను అడిగి తెలుసుకున్నారు. ఇసుకదర్శి, నాగండ్ల, పావులూరు, ఇంకొల్లు గ్రామాల్లో రహదారులు, సీసీ రోడ్లు, డ్రైనేజీలు, జలధార పథకం పనులతో పాటు విలేజ్ హెల్త్ క్లినిక్‌లు, పంచాయతీ కాంప్లెక్స్‌లో నూతన గదులను ప్రారంభించి ప్రజలకు అందుబాటులోకి తీసుకొచ్చారు. నాగండ్లలో 31 మంది, ఇంకొల్లు మండలంలోని గొనసపూడి, సూదివారిపాలెం గ్రామాలకు చెందిన 37 మంది లబ్ధిదారులకు ఇళ్ల స్థలాల పట్టాలను పంపిణీ చేశారు. గ్రామీణ ప్రాంతాల్లో మౌలిక సదుపాయాల కల్పనకు ప్రాధాన్యమిస్తూ, ప్రజల అవసరాలకు అనుగుణంగా అభివృద్ధి కార్యక్రమాలు చేపడుతున్నట్లు నాయకులు తెలిపారు. కార్యక్రమంలో స్థానిక ప్రజాప్రతినిధులు, టీడీపీ నాయకులు, కార్యకర్తలు పాల్గొన్నారు.
