మంత్రి ఆనం కృషికి ముఖ్యమంత్రి కీలక భరోసా

మర్రిపాడు మేజర్ న్యూస్: ఆత్మకూరు నియోజకవర్గ అభివృద్ధి కోసం రాష్ట్ర దేవాదాయ ధర్మాదాయ శాఖ మంత్రి ఆనం రామనారాయణ రెడ్డి చేస్తున్న కృషికి ముఖ్యమంత్రి నారా చంద్రబాబు నాయుడు నుంచి కీలక భరోసా లభించింది. జిల్లాలోని వరికుంటపాడు మండలం రామాపురంలో మంగళవారం జరిగిన పల్లె పండుగ బహిరంగ సభలో సోమశిలకు సంబంధించిన పనులపై ముఖ్యమంత్రి చంద్రబాబు నాయుడు సానుకూలంగా స్పందించడం నియోజకవర్గ అభివృద్ధికి కొత్త ఆశలు రేకెత్తించింది. సోమశిల జలాశయంతో పాటు హైలెవల్ కెనాల్ మొదటి దశకు సంబంధించిన కీలక పనులను ముందుకు తీసుకెళ్లాలన్న మంత్రి ఆనం రామనారాయణ రెడ్డి సంకల్పానికి ముఖ్యమంత్రి స్పందనతో దీర్ఘకాలంగా ఈ ప్రాంత ప్రజలు, రైతులు ఎదురుచూస్తున్న సోమశిల అభివృద్ధి అంశానికి రామాపురం సభ వేదికగా మరో కీలక ముందడుగుగా భావిస్తున్నారు. ఈ నేపథ్యంలో సోమశిల ప్రాజెక్టు భద్రతకు 110 కోట్ల రూపాయలను, మర్రిపాడు మండల ప్రాంతంలో నిలిచిపోయిన సోమశిల హై లెవెల్ కెనాల్ మొదటి దశ పనులకు 85 కోట్ల రూపాయలను మంజూరు చేయిస్తానని హామీ ఇవ్వడంతో మెట్ట రైతులకు ఊరట లభించేందని చెప్పవచ్చు. ఈ పనులను పరిశీలించమని సభా వేదిక మీద ఉన్న స్థానిక శాసనసభ్యులు మరియు రాష్ట్ర దేవాదాయ శాఖ మంత్రి ఆనం రామనారాయణరెడ్డికి, ఇరిగేషన్ మంత్రి నిమ్మల రామానాయుడుకు తెలపడం జరిగింది.