మౌలిక వసతుల కల్పనకు పెద్దపీట

ఐదు ప్రధాన రహదారి పనులకు శంకుస్థాపన చేసిన ఎమ్మెల్యే గొండు శంకర్

గార అక్టోబర్ 1 మేజర్ న్యూస్: గ్రామీణ ప్రాంతాల్లో రవాణా వ్యవస్థను మెరుగుపరిచే లక్ష్యంతో నియోజకవర్గంలో రహదారి అభివృద్ధి పనులు చేపడుతున్నట్లు ఎమ్మెల్యే గొండు శంకర్ తెలిపారు. ఇందులో భాగంగా గురువారం గార, రూరల్ మండలాల పరిధిలో ఐదు ప్రధాన రహదారి నిర్మాణ పనులకు ఆయన శంకుస్థాపన చేశారు.

ఈ సందర్భంగా ఎమ్మెల్యే మాట్లాడుతూ.. నియోజకవర్గంలో రెండు మండలాలు మాత్రమే ఉన్నప్పటికీ రహదారి అభివృద్ధి కోసం రికార్డు స్థాయిలో రూ.12.72 కోట్ల నిధులు మంజూరయ్యాయని తెలిపారు. జిల్లాలోనే అత్యధికంగా నిధులు సాధించామని పేర్కొన్నారు. తొలి విడతలో రూ.3.63 కోట్ల అంచనా వ్యయంతో ఐదు రహదారి పనులను ప్రారంభించినట్లు చెప్పారు.

ఇందులో రూ.80 లక్షలతో శ్రీకూర్మం నుంచి ఎస్.మచ్చలేశం వరకు, రూ.65 లక్షలతో శ్రీకూర్మం జెడ్‌పీ రోడ్డు నుంచి దువ్వపేట వరకు, రూ.73 లక్షలతో సి.ఎస్.పీ. రహదారి నుంచి కొత్తూరు సైరిగాం వరకు రహదారి నిర్మాణ పనులు చేపట్టనున్నారు. అలాగే రూ.కోటి వ్యయంతో దీపావళి ఆర్‌అండ్‌బీ రోడ్డు నుంచి రాళ్లపేట వరకు, రూ.48 లక్షలతో సి.ఎస్.పీ. రహదారి నుంచి బావాజీపేట వరకు రహదారి పనులు చేపట్టనున్నట్లు వెల్లడించారు.

గత పాలకుల మాదిరిగా మాటలకే పరిమితం కాకుండా నిధులు మంజూరు చేయించి, పనులను క్షేత్రస్థాయిలో ప్రారంభించిన తర్వాతే ప్రజల ముందుకు వస్తున్నామని ఎమ్మెల్యే పేర్కొన్నారు. రహదారి పనులు పూర్తయితే ఆయా ప్రాంతాల ప్రజల రవాణా సమస్యలు పరిష్కారమవుతాయని అన్నారు. రాబోయే రోజుల్లో ఇళ్ల పట్టాలు, ఇతర మౌలిక వసతుల కల్పనకు కూడా ప్రాధాన్యం ఇస్తామని తెలిపారు.

కార్యక్రమంలో గార, రూరల్ మండలాల నాయకులు, శ్రీకూర్మం, కొత్తూరు సైరిగాం, దీపావళి, రాగోలు గ్రామాల నాయకులు, కూటమి నాయకులు, కార్యకర్తలు, ప్రజలు పాల్గొన్నారు.