మహాలక్ష్మీదేవిగా కనకదుర్గమ్మ దివ్యదర్శనం

ఇంద్రకీలాద్రి, మేజర్ న్యూస్: దసరా శరన్నవరాత్రి ఉత్సవాల్లో ఏడో రోజైన శనివారం ఇంద్రకీలాద్రిపై శ్రీ కనకదుర్గమ్మవారు శ్రీ మహాలక్ష్మీదేవి అలంకారంలో భక్తులకు దర్శనమిస్తున్నారు. “జై దుర్గా భవానీ.. జై జై మహాలక్ష్మీ” అంటూ భక్తుల నామస్మరణతో కొండ మార్మోగుతోంది. సిరిసంపదలు, సౌభాగ్యం, సుఖసంతోషాలు ప్రసాదించే జగన్మాతను దర్శించుకునేందుకు భక్తులు పెద్ద సంఖ్యలో తరలివస్తున్నారు. మహాలక్ష్మీ స్వరూపంలో కొలువుదీరిన అమ్మవారిని దర్శించుకుని భక్తులు తన్మయత్వం చెందుతున్నారు. తమ కుటుంబాలు సుభిక్షంగా ఉండాలని, రైతులకు పాడిపంటలు సమృద్ధిగా పండాలని, వ్యాపారాలు అభివృద్ధి చెందాలని, ప్రతి ఇంటా ఆనందం వెల్లివిరియాలని జగన్మాతను ప్రార్థిస్తున్నారు. ఐశ్వర్యం, ధాన్యసంపద, సౌభాగ్యం, ఆరోగ్యం, ధైర్యం, జ్ఞానం, కుటుంబ సౌఖ్యాలను ప్రసాదించే తల్లిగా మహాలక్ష్మీదేవిని భక్తులు ఆరాధిస్తున్నారు. అమ్మవారి కరుణాకటాక్షాలు తమ కుటుంబాలపై ఎల్లప్పుడూ ఉండాలని మనసారా వేడుకుంటూ మొక్కులు చెల్లించుకుంటున్నారు. దసరా ఉత్సవాల సందర్భంగా ఇంద్రకీలాద్రిపై నెలకొన్న ఆధ్యాత్మిక వాతావరణం భక్తులను భక్తిపారవశ్యంలో ముంచెత్తుతోంది.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.