కాకినాడ జిల్లా స్కూల్ గేమ్స్‌కు నూతన సెక్రటరీలు

ఆర్గనైజింగ్ సెక్రటరీగా పి.శ్రీనివాస్

అడ్మిన్ సెక్రటరీగా వి.పి.ఎస్‌.ఎస్‌.కుమారి

గురువారం బాధ్యతలు స్వీకరించిన ఇద్దరు

నేడు జిల్లా సెలక్షన్స్ షెడ్యూల్ విడుదల

ఉమ్మడి గోదావరి జిల్లాల సూర్య బ్యూరో
(కాకినాడ)

 కాకినాడ జిల్లా స్కూల్ గేమ్స్ ఆర్గనైజింగ్ సెక్రటరీగా వాకలపూడి జెడ్పీ హైస్కూల్‌కు చెందిన ఎస్‌ఏ (పీఈ) పి.శ్రీనివాస్, అడ్మిన్ సెక్రటరీగా పిఠాపురం బీఎంఆర్ ప్రభుత్వ బాలికల ఉన్నత పాఠశాలకు చెందిన ఎస్‌ఏ (పీఈ) వి.పి.ఎస్‌.ఎస్‌.కుమారి నియమితులయ్యారు. డైరెక్టర్ ఆఫ్ స్కూల్ ఎడ్యుకేషన్ ఈ నెల 17న జారీ చేసిన ఉత్తర్వుల మేరకు వీరిద్దరూ గురువారం బాధ్యతలు స్వీకరించినట్లు జిల్లా విద్యాశాఖాధికారి పి.రమేష్ తెలిపారు.

జిల్లా క్రీడల నిర్వహణ బాధ్యత

2026–27 విద్యా సంవత్సరానికి అండర్-14, అండర్-17 విభాగాల్లో స్కూల్ గేమ్స్ నిర్వహణకు సంబంధించి వీరు బాధ్యతలు నిర్వర్తించనున్నారు. జిల్లా స్థాయిలో క్రీడా పోటీలు, ఎంపిక ప్రక్రియ నిర్వహణతో పాటు రాష్ట్ర, జాతీయ స్థాయి పోటీలకు విద్యార్థుల ఎంపికను సమన్వయం చేయనున్నారు.

జాతీయ క్యాలెండర్‌కు అనుగుణంగా..

జాతీయ స్థాయి స్కూల్ గేమ్స్ క్యాలెండర్ విడుదలైన నేపథ్యంలో దానికి అనుగుణంగా జిల్లాలో ఎంపిక పోటీల నిర్వహణకు షెడ్యూల్ సిద్ధం చేయాలని డీఈవో పి.రమేష్ నూతన సెక్రటరీలను ఆదేశించారు.

నేడు సెలక్షన్స్ షెడ్యూల్

జిల్లాలో వివిధ క్రీడలకు ఎంపికలు ఎప్పుడు నిర్వహించాలి, పోటీల నిర్వహణ ఎలా ఉండాలనే అంశాలతో షెడ్యూల్ సిద్ధం చేస్తున్నారు. జిల్లా సెలక్షన్స్ షెడ్యూల్‌ను శుక్రవారం విడుదల చేయనున్నట్లు డీఈవో తెలిపారు.