హొళగుంద జడ్పీటీసీ అభ్యర్థి ఖరారుపై వీడని ఉత్కంఠ..!
హొళగుంద జడ్పీటీసీ అభ్యర్థి ఖరారుపై వీడని ఉత్కంఠ..!
హొళగుంద, సూర్య ప్రతినిధి
కర్నూలు జిల్లా ఆలూరు నియోజకవర్గంలోని హొళగుంద మండలంలో టీడీపీ జడ్పీటీసీ అభ్యర్థి ఎంపికపై ఉత్కంఠ కొనసాగుతోంది. జడ్పీటీసీ స్థానం కోసం టీడీపీ సీనియర్ నాయకుడు ఈడిగ గోవింద గౌడ్‌, ఎల్లార్తి గ్రామానికి చెందిన కురువ సామాజిక వర్గ నాయకుడు దర్గన్న పోటీ పడుతుండటంతో అభ్యర్థి ఎంపిక ఆసక్తికరంగా మారింది.
ఒకే పార్టీకి చెందిన ఇద్దరు నాయకులు జడ్పీటీసీ టికెట్‌ కోసం ప్రయత్నిస్తుండటంతో ఈ అంశం పార్టీ వర్గాల్లో చర్చనీయాంశంగా మారింది. ఈ నేపథ్యంలో పార్టీ అధిష్టానం అభ్యర్థి ఎంపికపై ఐవీఆర్‌ఎస్‌ ఫోన్‌ కాల్స్‌ ద్వారా సర్వే నిర్వహించినట్లు సమాచారం.
ఈ సర్వేలో భాగంగా టీడీపీ తరఫున జడ్పీటీసీ అభ్యర్థిగా ఎల్లార్తి దర్గన్నను కోరుకునే వారు ఒకటి నొక్కాలని, ఈడిగ గోవింద గౌడ్‌ను కోరుకునే వారు రెండు నొక్కాలని ఫోన్‌ ద్వారా అభిప్రాయాలు సేకరించినట్లు తెలిసింది. మండలంలోని పలువురికి ఈ ఫోన్‌ కాల్స్‌ వెళ్లడంతో అభ్యర్థి ఎంపికపై ఆసక్తి నెలకొంది.
ఐవీఆర్‌ఎస్‌ సర్వేలో వెల్లడైన అభిప్రాయాలను పరిగణనలోకి తీసుకుని పార్టీ అధిష్టానం ఎవరికి అవకాశం కల్పిస్తుందనేది ఇప్పుడు చర్చనీయాంశంగా మారింది. హొళగుంద జడ్పీటీసీ అభ్యర్థిగా పార్టీ ఎవరిని ప్రకటిస్తుందో తెలియాలంటే అధికారిక ప్రకటన వెలువడే వరకు వేచి చూడాలి
ఉమాపతి సూర్య ప్రతినిధి హొళగుంద కర్నూలు జిల్లా
